«СОЛИМИИ ҶАВОНОН-СОЛИМИИ МИЛЛАТ». Бахшида ба Рӯзи Конститутсияи Ҷумҳурии Тоҷикистон дар Муъминобод ҳамоиш доир шуд

ДУШАНБЕ, 01.11.2023. /АМИТ «Ховар»/. Бахшида ба Рӯзи Конститутсияи Ҷумҳурии Тоҷикистон дар Маркази ҷумҳуриявии барқарорсозии бемориҳои қалби ноҳияи Муъминобод бо иштироки намояндаи Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар мавзуи «Солимии ҷавонон-солимии миллат» ҳамоиш баргузор гардид. Дар ин хусус АМИТ «Ховар» бо истинод ба Кумитаи кор бо ҷавонон ва варзиши ҷумҳурӣ хабар медиҳад.

Дар ҳамоиш намояндаи Кумита аз дастгириҳои давлату Ҳукумати мамлакат нисбат ба насли ҷавон, даҳ самти афзалиятноки соҳаи кор бо ҷавонон, пешгирӣ намудани омилҳои номатлуби иҷтимоӣ байни наврасону ҷавонон ва тарғибу ташвиқи тарзи ҳаёти солим ёдовар шуда, ҷавононро ба ватандӯстиву меҳанпарастӣ даъват намуд.

Таъкид гардид, ки  эҳсоси баланди  ватандӯстӣ дар замири ҷавонон яке аз воситаҳои муҳими тарбия ва баланд бардоштани сатҳи маърифати ин насли ояндасоз буда, он дар ташаккули арзишҳои ахлоқиву маънавии ҷомеа нақши калидӣ мебозад. Махсусан тарбияи ҷавонон дар руҳияи ватандӯстӣ яке аз ҳадафҳои олии Ҳукумати мамлакат ва аз самтҳои афзалиятноки сиёсати давлатии кор бо ҷавонон мебошад.

Дар ҳамоиш ба масъалаи пешгирии ҷавонон аз ҳизбу ҳаракатҳои террористӣ-экстремистӣ, гурӯҳҳои ифротӣ, тарбияи онҳо дар руҳияи худогоҳиву худшиносӣ, пешгирии хурофотпарастӣ, таҳкими ваҳдат ва сулҳу субот дар ҷомеа диққати махсус дода шуд.

Ҳамзамон намояндагони Кумитаи кор бо ҷавонон ва варзиши назди Ҳукумати Ҷумҳурии Тоҷикистон ҷавонони маъюби Ҷамоати деҳоти Муъминободро хабар гирифта, ба онҳо туҳфаҳо супориданд.

Дар анҷоми ҳамоиш ба ҷавонони фаъоли ноҳияи Муъминобод сипосномаи Кумитаи кор бо ҷавонон ва варзиши назди Ҳукумати Ҷумҳурии Тоҷикистон тақдим шуд.

АКС: Кумитаи кор бо ҷавонон ва варзиши назди Ҳукумати Ҷумҳурии Тоҷикистон