ВУСЪАТИ БУНЁДИ ИНШООТИ СОҲАИ МАОРИФ. Дар ноҳияи Данғара биноҳои нави 3 муассисаи таҳсилоти миёнаи умумӣ мавриди истифода қарор дода шуд

ДУШАНБЕ, 25.11.2023. /АМИТ «Ховар»/. Дар арафаи таҷлили рӯзи  Парчами давлатии Ҷумҳурии Тоҷикистон дар ноҳияи Данғара биноҳои нави як қатор муассисаҳои таҳсилоти миёнаи умумӣ мавриди истифода қарор гирифтанд. Дар ин хусус ба АМИТ «Ховар» дар Мақомоти иҷроияи ҳокимияти давлатии ноҳияи Данғара хабар доданд.

Аз ҷумла,  дар деҳаи «Зарнисор»-и Ҷамоати деҳоти Сангтудаи ноҳияи Данғара бинои нави Муассисаи таҳсилоти миёнаи умумии рақами 83 барои 240 хонанда дар як баст ба истифода дода шуд.

Иттилоъ дода шуд, ки бинои мазкур аз 2 ошёна иборат буда, дорои 6 синфхона, 1 синфхонаи компютерӣ ва 1 китобхона мебошад.

Ҳамчунин дар деҳаи «Навобод»-и Ҷамоати деҳоти Сангтуда бинои нави Муассисаи таҳсилоти миёнаи умумии рақами 82 барои 180 хонанда дар як баст ифтитоҳ гардид.

Ин бино аз 2 ошёна иборат буда, дорои 6 синфхона, 1 синфхонаи компютерӣ ва 1 китобхона мебошад.

Дар деҳаи «Дурахшон»-и деҳоти ба номи Исмат Шарифов бинои нави Муассисаи таҳсилоти миёнаи умумии рақами 84 барои 240 хонанда дар як баст мавриди истифода қарор дода шуд.

Бинои мактаб аз 2 ошёна иборат буда, дорои 6 синфхона, 1 синфхонаи компютерӣ ва 1 синфхонаи инкишофи кӯдак мебошад.

АКС: Мақомоти иҷроияи ҳокимияти давлатии ноҳияи Данғара