Дар 30 корхонаи вилояти Суғд соли равон 3724 тонна равған истеҳсол шудааст

ДУШАНБЕ, 05.12.2023. /АМИТ «Ховар»/. Дар вилояти Суғд бо мақсади иҷрои дастуру супоришҳои Президенти Ҷумҳурии Тоҷикистон муҳтарам Эмомалӣ Раҳмон ашёи хом коркард шуда, бозори истеъмолӣ бо маҳсулоти ватанӣ таъмин карда мешавад. Аз ҷумла, дар шаҳру ноҳияҳои вилоят беш аз 30 адад корхонаи истеҳсоли равған фаъолият дошта, соли равон дар онҳо 3724 тонна равған истеҳсол шудааст. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии вилояти Суғд хабар медиҳад.

Бояд гуфт, ки ҶДММ «Сахо», ҶДММ «Шамс 777», ширкати «Фаровон» ва корхонаи «Зирвеко» аз зумраи  корхонаҳои истеҳсоли равған дар вилоят мебошанд, ки  ба истеҳсоли маҳсулоти баландсифати ҷавобгӯ ба талаботи меъёрҳои стандартӣ  машғул мебошанд.

Дар ҶДММ «Сахо» дар як шабонарӯз 3,5 тонна равған истеҳсол  мегардад. Барои фаъолияти муназзами корхона миқдори зарурии чигит захира шуда, дар он 46 нафар фаъолият доранд.

Дар ҶДММ  «Шамс 777», ки ба қабулу коркарди пахта ва истеҳсоли равған машғул аст, то имрӯз 1000 тонна чигит коркард гардида, 800 тоннаи дигар захира карда шудааст.

Корхонаи равғанбарории ширкати «Фаровон» аз зумраи корхонаҳои калони истеҳсолӣ буда, масъулони ширкат тасмим гирифтаанд, ки  сехҳои навро ба кор андохта, ҳаҷми истеҳсолро зиёд намоянд. Корҳои бунёдии сехи нав тибқи нақша ҷараён дошта, бо мавриди истифода қарор гирифтани он боз 20 нафар бо ҷойи корӣ таъмин мегарданд.

Сифати равған дар корхонаи ширкат бо истифода аз таҷҳизоти зарурӣ ҳар ду соат пурра назорат карда мешавад. Истеҳсол ва бандубасти равған дар ин корхона мутобиқ ба стандартҳои байналмилалӣ буда, дорои сифати баланд мебошад.

Корхонаи равғанбарории «Зирвэко» дар шаҳри Хуҷанд бо истифода аз технологияҳои муосири истеҳсоли Чин ва Итолиё бунёд гардида, дар он аз маҳсулоти равғани хом маҳсулоти баландсифати ҷавобгӯ ба талаботи меъёрҳои стандартӣ омода менамоянд. Иқтидори истеҳсолии корхона дар як шабонарӯз 30 тонна буда, он асосан равғани хоми пахта, рапс, зағир ва дигар зироатҳои равғандеҳро бо сифати баланд коркард намуда, ба харидорон пешниҳод менамояд.

Мавриди тазаккур аст, ки аз ҷониби Ҳукумати мамлакат ҷиҳати рушди бахши хусусӣ имтиёзу сабукиҳо пешниҳод гардида, соҳибкорон бо истифода аз имкониятҳои мавҷуда дар роҳандозии истеҳсоли маҳсулоти воридотивазкунанда саҳми шоиста мегузоранд.

АКС аз бойгонӣ