Дар Донишгоҳи давлатии Кӯлоб оид ба рушди низоми бонкӣ ва рақамикунонии бахши молиявӣ конфронси байналмилалӣ доир гардид

ДУШАНБЕ, 20.12.2023 /АМИТ «Ховар»/. Дар Донишгоҳи давлатии Кӯлоб ба номи Абуабдуллоҳи Рӯдакӣ дар мавзуи «Рушди низоми бонкӣ ва рақамикунонии бахши молиявӣ» бо иштироки коршиносони соҳа аз ташкилоту муассисаҳои молиявии мамлакат, намоядагони бонкҳои тиҷоратӣ, ташкилоти суғуртавӣ ва ҳайати омӯзгорону донишҷӯёни донишгоҳ конфронси байналмилалии илмӣ-назариявӣ баргузор гардид. Дар ин хусус ба АМИТ «Ховар» дар Донишгоҳи давлатии Кӯлоб ба номи Абуабдуллоҳи Рӯдакӣ хабар доданд.

Гуфта шуд, ки гузариш ба иқтисоди рақамӣ ва татбиқи муносибатҳои иқтисодӣ тариқи технологияҳои инноватсионӣ нақши бонкҳоро дар иқтисодиёт боз ҳам боло мебарад. Зеро ҳисоббаробаркунӣ байни субъектони хоҷагидорӣ ба воситаи ташкилоти қарзӣ тариқи ғайринақдӣ амалӣ гардида, раванди гузариш ба иқтисоди рақамиро суръат мебахшад.

Ҷорӣ намудани технологияҳои рақамӣ малакаҳои нав ва кадрҳои баландихтисосро дар соҳаи технологияҳои рақамӣ бо мақсади самаранок иҷро намудани ниёзҳои муштариён талаб менамояд. Ташкилоти қарзӣ фаъолияти худро тавассути ҷорӣ намудани технологияҳои рақамӣ такмил медиҳанд, ки ин имкон медиҳад муваффақ ва рақобатпазир бошанд.

Конфронс дар чор бахш: «Рақамикунонӣ ҳамчун пешбарандаи фаъолияти инноватсионӣ дар низоми бонкӣ», «Гузаштани хизматрасонии давлатӣ ба пардохтҳои ғайринақдӣ дар шароити иқтисоди рақамӣ», «Нақши рақамикунонӣ дар баланд бардоштани маърифати молиявии аҳолӣ» ва «Мавқеи рақамикунонии низоми молиявӣ дар рушди устувори иқтисоди миллӣ» гузашта, дар он маърузаҳо бо забонҳои тоҷикӣ, русӣ ва англисӣ дар шакли ҳузурӣ ва ғоибона (маҷозӣ) мавриди баррасӣ қарор гирифтанд.

Дар конфронси байналмилалӣ беш аз 140 олиму муҳаққиқ аз муассисаҳои таҳсилоти олии касбии ватанӣ ва хориҷӣ, аз қабили Юнон, Кореяи Ҷанубӣ, Туркия, Федератсияи Русия, Ҷумҳурии Беларус, Ҷумҳурии Қазоқистон маърузаҳои илмӣ пешниҳод намуданд.

АКС: Донишгоҳи давлатии Кӯлоб