Дар Маркази офиятбахшӣ ва парваришгоҳи бабри барфӣ дар ноҳияи Мурғоб чор намуди ин ҳайвони нодир ҳифз мешавад

ХОРУҒ, 23.12.2023 /АМИТ «Ховар»/. Бабри барфӣ яке аз ҷонварони нодири ҷумҳурӣ буда, бо мақсади ҳифзи он дар ноҳияи Мурғоб  чор моҳ пеш Маркази офиятбахшӣ ва парваришгоҳи бабри барфӣ бунёд гардид, ки ҳоло дар ин ҷо чор сар бабри  барфӣ ҳифзу парвариш мешаванд. Ду сар ҷинси модина буда, пас аз чанд муддат насл медиҳанд.

Сардори Шуъбаи ҳифзи муҳити зисти ин ноҳия Шаҳтут Сабзалиев ба хабарнигори минтақавии АМИТ «Ховар» Файз Мирасан  гуфт, ки «Маркази офиятбахшӣ ва парвариши бабри барфӣ бо кумаку пуштибонии молии  Кумитаи ҳифзи муҳити зисти назди Ҳукумати Ҷумҳурии Тоҷикистон бунёд  шуд, ки яке аз ҳадафҳои он- ҳифз ва зиёд намудани саршумори ин ҳайвони нодир ба шумор меравад.

Дар марказ чанд нуқтаи нигоҳдории ин ҳайвони нодир вобаста ба ҳар фасли сол мавҷуд аст. Иқлими ин ноҳияи баландкӯҳ дар фасли зимистон хеле сард аст ва бо ин мақсад барои бабри барфӣ шабона дар оғилхона ва рӯзона дар берун, ки чор тарафи он панҷара кашида шудааст, шароити муътадил фароҳам овардаанд».

Мутахассиси Маркази офиятбахшӣ ва парваришгоҳи бабри барфӣ Содиқҷон Бахталиев зиёда аз 15 сол боз буду боши ин ҷонвари зеборо мушоҳида менамояд.

Ӯ давоми ин солҳо даҳҳо сари онро, ки ба ҳайвоноти хонагии сокинони маҳалӣ ҳамла намудаву ба даст афтодаанд, ба қафас андохта, ба доманакӯҳҳо бурда сар додааст. Баъзе аз ин ҷонварон захм бардошта буданд ва тақдири  минбаъдаашон номаълум боқӣ мемонд. Пас аз бунёди марказ акнун он ҷонвароне, ки ба деҳа мефароянд ва ҳангоми ҳамла ба ҳайвоноти хонагӣ ба даст меафтанд, ба ин марказ оварда мешаванд. Онҳо дар ин ҷо таҳти назорати духтурони байтор қарор мегиранд.

Дар марказ озмоишгоҳ барои ташхиси пурраи вазъи саломатии бабри барфӣ  мавҷуд аст ва дар лаҳзаҳои зарурӣ амали ҷарроҳӣ низ дар ин ҷо анҷом дода мешавад. Ҳоло дар ин марказ чаҳор сар бабри барфӣ, ки бештарашон ҳангоми ҳамла ба ҳайвоноти хонагӣ дастгир шудаанд, ҳифзу нигаҳдорӣ мешаванд.

Аз ин чаҳор сар ду ҷинсаш модина буда, ба гуфтаи мутахассисон пас аз наслгирӣ ба табиат сар дода мешаванд. Барои «бошандагон»-и ин марказ дар як рӯз аз ду то се килограмм гӯшт муҳайё мешавад ва дар вақти ҷуфтшавӣ миқдори хӯрокашон боз  афзоиш меёбад. Марказ тавассути дегхонаи буғӣ бо гармӣ ва ба воситаи панелҳои офтобӣ бо рўшноӣ таъмин мешавад.

Ҷумҳурии Тоҷикистон аз ҷумлаи 12 мамлакати дорои макони зисти озодапаланг дар ҷаҳон шинохта шуда, ба Китоби сурхи ҷаҳонӣ ва Китоби сурхи Ҷумҳурии  Тоҷикистон шомил шудааст. Мавҷуд будани бабри барфӣ дар ҳар мамлакат- ин нишондиҳандаи поктарин экосистема шуморида мешавад.

АКС: АМИТ «Ховар»