Дар ноҳияи Абдураҳмони Ҷомӣ ҷамъоварии ҳосили қулфинай идома дорад

ДУШАНБЕ, 30.12.2023. /АМИТ «Ховар»/. Дар Ҷамоати деҳоти Калинини ноҳияи Абдураҳмони Ҷомӣ ҷамъоварии ҳосили қулфинай бомаром идома дорад,  иттилоъ доданд ба АМИТ «Ховар» дар шуъбаи иттилоотию таҳлилии дастгоҳи Раиси вилояти Хатлон.

Раиси вилояти Хатлон Давлаталӣ Саид дар ноҳияи Абдураҳмони Ҷомӣ бо ҷараёни ҷамъоварии ҳосили қулфинай дар гармхонаҳо шинос шуд. Ин гармхонаҳо зери роҳбарии Искандар Аваззода дар масоҳати 1 гектар барои парвариши қулфинай бунёд шуда, 1 моҳ мешавад, ки ҳосили онро ба бозор баровардаанд. Дар назар аст, ки аз 1 гектар 15 тонна қулфинай ҳосил гирифта шавад.

Ба иттилои деҳқонон, соли равон парвариши қулфинай нисбат ба нишондиҳандаи ҳамин давраи соли гузашта хеле хуб буда, 1 килои он ҳоло 90 сомонӣ ба фурӯш гузошта шудааст.

Раиси вилояти Хатлон Давлаталӣ Саид зимни шиносоӣ бо гармхона рушди соҳаи кишоварзӣ ва ташкили чунин иншоотро омили муҳими таъмини аҳолӣ бо маҳсулоти тару тозаи худӣ маънидод намуда, барои  густариши фаъолияти минбаъдаву афзоиши истеҳсоли маҳсулот дар гармхона ба масъулин дастуру маслиҳатҳои муфид дод.

АКС: шуъбаи иттилоотию таҳлилии дастгоҳи Раиси вилояти Хатлон