Дар шаҳри Бӯстон доир ба нақши Президенти Тоҷикистон дар рушди забони давлатӣ конференсия баргузор шуд

ДУШАНБЕ, 31.12.2023 /АМИТ «Ховар»/. Дар Гимназияи №1-и шаҳри Бӯстон конфренсияи илмӣ-назариявӣ таҳти унвони «Нақши Президенти Ҷумҳурии Тоҷикистон муҳтарам Эмомалӣ Раҳмон дар рушди забони давлатӣ» ва ҷаласаи ҷамъбастии маҳфили «Посдорон ва дӯстдорони забони давлатӣ» доир гардид, хабар медиҳад АМИТ «Ховар» бо истинод ба Мақомоти иҷроияи ҳокимияти давлатии шаҳри Бӯстон.

Дар конференсия иштирокчиён оид ба иқдому ташаббусҳои дурнигаронаи Президенти ҷумҳурӣ муҳтарам Эмомалӣ Раҳмон дар самти гиромидошт ва рушди забони давлатӣ ва амалигардонии Қонуни Ҷумҳурии Тоҷикистон «Дар бораи забони давлатии Ҷумҳурии Тоҷикистон» ва «Барномаи рушди забони давлатӣ барои солҳои 2020-2030» сухан намуданд.

Дар мавзуъҳои «Нақши Пешвои миллат дар рушди забони давлатӣ», «Забон рукни ҳастии миллат» маърузаҳо шунида шуд.

Дар конференсия аз натиҷаи фаъолияти маҳфили «Посдорон ва дӯстдорони забони давлатӣ» дар соли 2023, ки моҳи феврали соли равон дар назди Мақомоти иҷроияи ҳокимияти давлатии шаҳри Бӯстон таъсис ёфтааст, гузориш пешниҳод гардид.

Муовини раиси шаҳри Бӯстон барои вусъати фаъолият ва амалӣ намудани ташаббусҳои наҷиб дар самти рушди забони давлатӣ дар заминаи муқаррароти санадҳои марбут ба забони давлатӣ ба аъзо ва ҳайати роҳбарияти маҳфил дастуру супоришҳои мушаххас пешниҳод намуд.

Дар фарҷом ғолибони озмунҳои «Посдорони забони давлатӣ», иншои беҳтарин дар мавзуи «Забони давлатӣ – сутуни асосии давлат», «Беҳтарин донандаи забони давлатӣ» ва мақолаи беҳтарин дар мавзӯи «Саҳми Президенти Ҷумҳурии Тоҷикистон муҳтарам Эмомалӣ Раҳмон дар рушди забони давлатӣ» аз рӯи се категория бо диплом ва асарҳои Президенти мамлакат «Забони миллат- ҳастии миллат», «Чеҳраҳои мондагор» ва дигар асарҳо қадршиносӣ шуданд.

Ҳамчунин аъзои фаъоли маҳфили «Посдорон ва дӯстдорони забони давлатӣ», ки дар рушди забони давлатӣ ва шинохти мақоми он дар шаҳр соли 2023 фаъолияти шоиста намуданд, бо сипоснома ва туҳфаҳои хотиравӣ сарфароз шуданд.

АКС: Мақомоти иҷроияи ҳокимияти давлатии шаҳри Бӯстон