Доир ба таъмини меҳнати шоиста дар соҳаи таълими касбӣ ва таълими босифат машварати омӯзишӣ гузаронида шуд

ДУШАНБЕ, 13.12.2023 /АМИТ «Ховар»/. 13 декабр дар доираи лоиҳаи муштараки Иттифоқи касабаи кормандони маориф ва илми Ҷумҳурии Тоҷикистон ва Ташкилоти Байналмилалии Меҳнат барои кормандони иттифоқи касабаи муассисаҳои таълимии таҳсилоти касбӣ дар мавзуи «Таъмини меҳнати шоиста дар соҳаи таълими касбӣ ва таълими босифат. Татбиқи самаранокии Тавсияи ТБМ №208» машварати омӯзишӣ баргузор гардид. Дар ин хусус АМИТ «Ховар» бо истинод ба Иттифоқи касабаи кормандони маориф ва илми Ҷумҳурии Тоҷикистон хабар медиҳад.

Машварати омӯзишӣ то 14 декабр идома ёфта, дар раванди он Стратегияи иттифоқҳои касаба барои татбиқи самараноки Тавсияи 208-и Ташкилоти Байналмилалии Меҳнат, механизмҳои муколамаи иҷтимоӣ дар сатҳи миллӣ ва соҳавӣ барои пешбурди таълими босифат мавриди баррасӣ қарор мегиранд.

Дар фарҷоми машварат иштирокчиён дар кори гурӯҳӣ оид ба масъалаҳои гуфташуда байни ҳам табодули афкор менамоянд.

АКС: Иттифоқи касабаи кормандони маориф ва илми Ҷумҳурии Тоҷикистон