Кишоварзони ноҳияи Мастчоҳ дар ёздаҳ моҳ ба маблағи зиёда аз 1 миллиард сомонӣ маҳсулот истеҳсол намудаанд

ДУШАНБЕ, 31.12.2023 /АМИТ «Ховар»/. Дар ёздаҳ моҳи соли равон кишоварзони ноҳияи Мастчоҳ ба маблағи 1 миллиарду 452 миллиону 556 ҳазор сомонӣ маҳсулот истеҳсол намудаанд, ки  ин рақам 135,8 фоизи ҳамин давраи соли 2022-ро ташкил медиҳад.

Тибқи иттилои Раёсати кишоварзии ноҳияи Мастчоҳ, дар давраи ҳисоботӣ дар ҳамаи шаклҳои хоҷагидорӣ дар ҳаҷми 16022,5 тонна ғалладонагӣ, 4649,5 тонна картошка, 23930,2 тонна сабзавот, 136224,4 тонна полезӣ, 1432,3 тонна мева, 701,3 тонна ангур истеҳсол шудааст, ки вусъати афзоиш дар ин самт аз 100 то 210 фоизро ташкил медиҳад.

Вобаста ба рушди соҳаи кишоварзӣ дар давраи ҳисоботӣ тадбирҳои судманд андешида шуда, дар натиҷа дар бахши хоҷагиҳои деҳқонӣ ва ҷамъиятӣ барои ҳосили соли 2023 дар майдони 22897 гектар кишту парвариши зироати кишоварзӣ гузаронида шуд, ки аз он 2668,7 гектарашро ғалладонагиҳо, 9556,3 гектар пахта, 3879,3 гектар зироатҳои равғандор, 140,1 гектар картошка, 183,7 гектар сабзавот, 3183 гектар полезӣ ва 3286,2 гектарашро зироатҳои хӯроки чорво ташкил медиҳад.

Дар ноҳия аз 102 923 гектар замини мавҷуда 29 437 гектарашро заминҳои корам ташкил намуда, аз майдони умумии заминҳои корам 24276 гектараш заминҳои корами обӣ мебошанд.

АКС: Раёсати кишоварзии ноҳияи Мастчоҳ