Кормандони филиали «Амонатбонк» дар ноҳияи Темурмалик соҳиби бинои хуштарҳу замонавӣ шуданд

ДУШАНБЕ, 18.12.2023 /АМИТ «Ховар»/. Дар ноҳияи Темурмалик барои кормандони «Амонатбонк» бинои хуштарҳу замонавӣ бо тамоми шароити муосир барои кору хизматрасонӣ ба истифода дода шуд. Дар ин хусус ба АМИТ «Ховар» дар Корхонаи воҳиди давлатии «Бонки амонатгузории Ҷумҳурии Тоҷикистон «Амонатбонк» иттилоъ доданд.

Бинои нави филиали рақами 62-и «Амонатбонк» дар ноҳияи Темурмалик мутобиқ ба талаботи замон навсозӣ гардида, дар он барои 26 корманд шароити муосири фаъолият муҳайё гардидааст.

Дар маросими ифтитоҳи бинои нави филиали №62-и «Амонатбонк» дар ноҳияи Темурмалик раиси Раёсати КВД Бонки амонатгузории Ҷумҳурии Тоҷикистон «Амонатбонк» Сироҷиддин Икромӣ ва роҳбарияти Мақомоти иҷроияи ҳокимияти давлатии ноҳияи Темурмалик иштирок намуданд.

Масоҳати бинои нави филиал бештар аз 900 метри мураббаъ буда, дорои 8 ҳуҷраи барҳавои корӣ, ҳуҷраҳои нигоҳдории ашёи қиматнок, анбор, ошхона ва дигар иншооти ёрирасон мебошад.

АКС: «Амонатбонк»