Намояндаи Тоҷикистон Гулчеҳра Қоҳирова дар нишасти байналмилии занон-кайҳоншиносон иштирок намуд

Декабрь 19, 2023 18:00

ДУШАНБЕ, 19.12.2023 /АМИТ «Ховар»/. Дар шаҳри Монреали Канада нишасти занон-коршиносони кайҳоншинос таҳти унвони «Таҳкими иқтидор ҷиҳати пешбурд ва дастёбӣ ба баробарии гендерӣ дар соҳаи кайҳоншиносӣ» ва дар шаҳри Венаи Австрия Анҷумани ҷаҳонии кайҳонӣ «Фазои кайҳонӣ барои ояндаи муштарак» баргузор гардид, ки дар он намояндаи Ҷумҳурии Тоҷикистон- олими соҳаи кайҳоншиносӣ Гулчеҳра Қоҳирова иштирок намуд. Дар ин хусус АМИТ «Ховар» хабар медиҳад.

Бояд гуфт, ки бо дастгириву мусоидати ҳамешагии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва дар раванди сиёсати давлатии дарҳои боз олимони Ҷумҳурии Тоҷикистон имкон пайдо намудаанд, ки натиҷаҳои фаъолияту навоварии худро дар фазои байналмилалӣ пешниҳод намоянд. Яке аз чунин олимҳои тоҷик- зане, ки Тоҷикистонро дар арсаи байналмилалӣ бо илму дониш ва кашфиёти назарраси астрономӣ муаррифӣ менамояд, Гулчеҳра Қоҳирова мебошад.

Ӯ доктори илмҳои физикаю математика, узви вобастаи Академияи миллии илмҳои Тоҷикистон, директори Институти астрофизикаи АМИТ ва ҳамзамон иҷрокунандаи вазифаи ноиби президенти АМИТ, Раиси шуъбаи илмҳои физикаю математика, химия, геология ва техникии АМИТ мебошад.

Тавре Гулчеҳра Қоҳирова иброз намуд, мақсади сафар ба шаҳри Монреали Канада ҳамчун намояндаи Тоҷикистон ва коршиноси эътирофшуда иштирок намудан дар нишасти занон-коршиносони кайҳоншинос таҳти унвони «Таҳкими иқтидор ҷиҳати пешбурд ва дастёбӣ ба баробарии гендерӣ дар соҳаи кайҳоншиносӣ» буд, ки он аз ҷониби Кумитаи фаъолияти кайҳонии Созмони Милали Муттаҳид (UNOOSA) ва Оҷонсии кайҳонии Канада ташкил ва амалӣ гардид.

Дар нишаст зиёда аз 34 давлати ҷаҳон иштирок намуда, дар он масъалаҳои муҳим оид ба таҳкими иқтидор ҷиҳати пешбурд ва дастёбӣ ба баробарии гендерӣ дар соҳаи кайҳоншиносӣ баррасӣ гардиданд.

Зимни нишаст Гулчеҳра Қоҳирова дар мавзуи «Ҳамкории байналмилалии занони олим ҳамчун шарти ҳатмии баробарии гендерӣ дар тадқиқоти кайҳон-Омӯзиши мисоли Тоҷикистон» (International cooperation of women scientists as a precondition for gender equality in space research – Tajikistan case study) доир ба сиёсати Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати дастгирӣ ва таҳкими саҳми занон дар ҷомеаи мамлакат, риояи баробарии гендерӣ дар ҳамаи соҳаҳои ҷомеа, аз ҷумла дар соҳаи илму маърифат сухан гуфт.

Баромад оид ба сиёсати давлат дар соҳаи илм ва дастовардҳои кайҳоншиносони ҷумҳурӣ аз тарафи кумитаи тадорукот ва иштирокчиёни нишаст баланд арзёбӣ шуд.

Ҳамзамон аз 11 то 15 декабр дар шаҳри Венаи Австрия Гулчеҳра Қоҳирова ҳамчун коршиноси соҳаи кайҳон ва намояндаи Ҷумҳурии Тоҷикистон дар Анҷумани ҷаҳонии кайҳонӣ «Фазои кайҳонӣ барои ояндаи муштарак» иштирок намуд. Дар кори анҷуман масъалаҳои муҳим барои тамоми башарият оид ба ояндаи идоракунии фаъолияти кайҳонӣ- истифодаи баробари дастовардҳои технологияҳои кайҳонӣ барои рушди устувори ҷамъият баррасӣ гардиданд.

Дар кори нишаст коршиносони зиёда аз 80 давлати ҷаҳон иштирок намуданд. Олими тоҷик доир ба натиҷаҳои таҳқиқоти кайҳонӣ дар Тоҷикистон бо мақсади муаррифӣ намудани сиёсати давлат дар соҳаи илм ва дастовардҳои кайҳоншиносони мамлакат дар арсаи ҷаҳонӣ маърузаи илмӣ намуд.

Тавре зимни суҳбат Гулчеҳра Қоҳирова иброз намуд, дар ҷаҳон байни астрономҳои ҳирфаӣ чорякашонро занон ташкил медиҳанд ва давлатҳое ҳастанд, ки дар онҳо умуман занони ситорашинос фаъолият надоранд.

«Мо метавонем ифтихор намоем, ки Тоҷикистон ба он давлатҳое дохил мешавад, ки дар онҳо шумораи кофии астрономҳои зан вуҷуд дорад ва онҳо дар ин самт баробари мардон фаъолият мебаранд», — гуфт ӯ.

Бояд гуфт, ки дар солҳои Истиқлолияти давлатӣ ба як сайёраи хурд номи Гулчеҳра Қоҳирова дода шудааст. Ҳамзамон ӯ дорандаи Ҷоизаи байнидавлатии «Ситораҳои Иттиҳод» мебошад. Вай аввалин зани олим дар Тоҷикистон аст, ки ин ҷоизаро гирифтааст.

Бо шарофат ва дастгириҳои пайвастаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон Эмомалӣ Раҳмон дар давраи соҳибистиқлолӣ мавқеи зан дар ҷомеа баланд бардошта шуд. Тамоми шароитро Сарвари давлат барои занони олим фароҳам оварданд, то онҳо дар ободиву пешрафти Ватан саҳм гузоранд.

Дар ҷавоб ба ғамхориҳои Роҳбари давлат занон – духтарони тоҷик кӯшиш ба харҷ медиҳанд, ки дар тамоми соҳаҳо, аз ҷумла маориф, тандурустӣ, мақомоти ҳифзи ҳуқуқ ва ғайра фаъолият намуда, сазовори ин ғамхориҳо бошанд.

София ШОИК,
АМИТ «Ховар»

АКС аз Гулчеҳра Қоҳирова

Декабрь 19, 2023 18:00

Хабарҳои дигари ин бахш

ИМРӮЗ-РӮЗИ АДВОКАТҲО. Асоси ислоҳоти ниҳоди адвокатураи Тоҷикистонро Паёми Президенти Тоҷикистон ба Маҷлиси Олӣ ташкил медиҳад
«МАКТАБИ СИЁСИИ ПЕШВОИ МИЛЛАТ». Дар Кӯлоб Конференсияи IV байналмилалии илмӣ-назариявӣ баргузор гардид
Кумакҳои Пешвои миллат ба зарардидагони офати табиӣ дар ноҳияҳои Нуробод ва Рашт расиданд
Дар Душанбе бо иштироки беш аз 10 ҳазор ҷавони гуногункасб Рӯзи ҷавонони Тоҷикистон бошукуҳ таҷлил шуд
Дар Озарбойҷон оид ба масъалаҳои оила, занон ва кӯдакон дар самти баробарии гендерӣ Ёддошти тафоҳум оид ба ҳамкорӣ ба имзо расид
23 МАЙ — РӮЗИ ҶАВОНОНИ ТОҶИКИСТОН. Дар Бадахшон ҷаласаи Шурои кор бо ҷавонон доир шуд
Бахшида ба Рӯзи ҷавонони Тоҷикистон ҳамоиши занону духтарони шаҳри Душанбе баргузор гардид
ОГОҲӢ. Дар Тоҷикистон 24-25 май боронҳои пуршиддат, сел, жола ва раъду барқ дар назар аст
«ШАРОРАИ ҶАВОНӢ». Бахшида ба Рӯзи ҷавонони Тоҷикистон барномаи фарҳангӣ-фароғатӣ баргузор мегардад
СОЛИ МАЪРИФАТИ ҲУҚУҚӢ. Оид ба нақшии калидии ташаккули маърифати ҳуқуқии шаҳрвандон дар давлати ҳуқуқбунёд ҳамоиш доир гардид
БА ТАЪСИСИ РӮЗИ ҶАВОНОНИ ТОҶИКИСТОН 27 СОЛ ПУР ШУД. Назарпурсӣ оид ба фаъолияти ҷавонон дар ҷавоб ба дастгириҳои Президенти Тоҷикистон ва Ҳукумати мамлакат
Президенти Тоҷикистон Эмомалӣ Раҳмон: «Ҷавонон умеду ояндаи давлат ва халқи Тоҷикистон мебошанд»