Роҳбарияти ширкати «Пеленг» бо фаъолияти низоми ягонаи автоматикунонии идораи ҳаракати ҳавоӣ дар Тоҷикистон шинос шуд

ДУШАНБЕ, 27.12.2023 /АМИТ «Ховар»/. Роҳбарияти Корхонаи воҳиди давлатии /КВД/ «Тоҷикаэронавигатсия» тасмим гирифтааст, ки бо корхонаҳои пешқадами соҳа дар хориҷи мамлакат ҳамкории судмандро амалӣ намояд.

Тавре дар КВД «Тоҷикаэронавигатсия» ба АМИТ  «Ховар» иттилоъ доданд, муовини директори генералии Ҷамъияти саҳомии кушодаи  «Пеленг»-и шаҳри Санкт-Петербурги Федератсияи Русия Мария Янушевич дар КВД «Тоҷикаэронавигатсия»  бо фаъолияти низоми ягонаи автоматикунонии идоракунии ҳаракати ҳавоӣ «Мастер-АС», ки дар ин ширкат истеҳсол ва дар доираи ҳамкории КВД «Тоҷикаэронавигатсия» ва ҶСК «Пеленг» дастрас ва насб гардидааст, шинос гардид.

Ин низом ҳам дар КВД «Тоҷикаэронавигатсия» ва дар филиалҳои корхона дар шаҳрҳои Хуҷанд, Кӯлоб ва Бохтар  фаъолият менамояд.

Низом  аз манбаи маълумоти назоратӣ, иттилоотӣ ва хизматрасонию банақшагирӣ иборат аст. Он таъмини бехатарии парвозҳо ва идоракунии ҳаракати ҳавоӣ, ҷамъоварии маълумот аз манбаъҳои гуногуни иттилоотӣ оид ба мавқеи нақлиёти ҳавоӣ (ҳама навъи мавҷқабулкунакҳо, ADS-B ва MLAT), қабули автоматӣ ва коркарди дастии иттилооти нақшавӣ, қабул ва истифодаи иттилооти метеорологӣ ва ғайраро амалӣ  менамояд.

АКС: КВД «Тоҷикаэронавигатсия»