35-СОЛАГИИ ИСТИҚЛОЛИ ДАВЛАТӢ. Дар ноҳияи Ёвон 136 иншооти гуногун ба истифода дода шудааст

ЁВОН, 21.01.2024. /АМИТ «Ховар»/. Ба истиқболи ҷашни 35-солагии  Истиқлоли давлатии Ҷумҳурии Тоҷикистон дар ноҳияи Ёвон  бунёду навсозии 498 иншооти таъйиноти  гуногун  ба нақша гирифта шудааст. То ин давра 136 иншоот мавриди баҳрабардорӣ қарор дода шуда, дар иншооти боқимонда корҳои сохтмонӣ идома доранд. Дар ин хусус мудири бахши меъморӣ ва шаҳрсозии ноҳияи Ёвон Суҳроб Сиддиқзода ба хабарнигори  АМИТ «Ховар» Субҳониддини Маҳмуд иттилоъ дод.

Масъулини Мақомоти иҷроияи ҳокимияти давлатии ноҳияи Ёвон хабар доданд, ки нақшаи чорабиниҳо  бахшида ба эълони Солҳои рушди саноат  (2022-2026)  ва ҷашни 35-солагии Истиқлоли давлатӣ таҳия шудааст. Дар доираи он дар ноҳия зиёда аз 34 коргоҳу корхонаи нави  саноатӣ, 50 иншооти соҳаи тандурустӣ, 46 иншооти соҳаи маориф, 10 иншооти фарҳангӣ, 20 иншооти варзишӣ, 23 иншооти соҳаи кишоварзӣ, 30 иншооти соҳаи сайёҳӣ  ва ҳунарҳои мардумӣ, 142 иншооти хизматрасонию савдо ва 52 иншооти дигар бунёд мегардад.

Мувофиқи ҳисоботи оморӣ, дар иншооти ба истифода супорида зиёда аз 100 нафар бо ҷойи кори доимӣ ва мавсимӣ таъмин шуданд.

АКС: Мақомоти иҷроияи ҳокимияти давлатии ноҳияи Ёвон