БА ИСТИҚБОЛИ ҶАШНИ 35-СОЛАГИИ ИСТИҚЛОЛИЯТИ ДАВЛАТӢ. Дар шаҳри Турсунзода корҳои ободонию роҳсозӣ вусъат меёбанд

ДУШАНБЕ, 06.01.2024. /АМИТ «Ховар»/. Дар доираи тадбирҳои  ободонию созандагӣ ба истиқболи ҷашни 35-солагии Истиқлолияти давлатии Ҷумҳурии Тоҷикистон дар шаҳри Турсунзода бунёду навсозии  роҳҳои маҳаллӣ  идома доранд. Аз ҷумла, бо ин мақсад 6 км роҳи деҳаи дурдасти Хуми Ҷамоати деҳоти Навободи шаҳри Турсунзода қумфарш гардид, иттилоъ медиҳад АМИТ «Ховар» бо истинод ба Мақомоти иҷроияи ҳокимияти давлатии шаҳри Турсунзода.

Сокинони ин маҳалла иброз доштанд, ки барои сазовор ва бошукуҳ пешвоз гирифтани ҷашни миллӣ ҳар тоҷкистониро зарур аст, ки саҳми хешро дар ободонию шукуфоии сарзамин гузорад.

Бояд гуфт, ки дар партави сиёсати созандаву бунёдкоронаи Пешвои миллат муҳтарам Эмомалӣ Раҳмон бобати вусъат додани корҳои ободонӣ бахшида ба сазовар пешвоз гирифтани ҷашни 35-солагии Истиқлоли давлатии Ҷумҳурии Тоҷикистон корҳои омодагӣ ба ин ҷашни бузурги миллӣ дар шаҳри Турсунзода вусъати тоза пайдо намудаанд.

Масъулин талош доранд, ки иншооти гуногуни нақшавиро то муҳлати муайянгардида сохта, мавриди баҳрабардорӣ қарор диҳанд ва ин ҷашни фархундаро бо дастоварҳои назаррас пешвоз гиранд. Бо ин мақсад дар Ҷамоати деҳоти Работ низ бетонпӯшкунии роҳҳо идома дошта, масъулин муваззаф шудаанд, ки корҳоро дар ин самт босифат анҷом диҳанд.

АКС: Мақомоти иҷроияи ҳокимияти давлатии шаҳри Турсунзода