Дар дараи Ромит барои донишҷӯёни Донишгоҳи давлатии омӯзгории Тоҷикистон иншооти таҷрибаомӯзӣ ба истифода дода шуд

ДУШАНБЕ, 27.01.2024 /АМИТ «Ховар»/. Дар дараи Ромит бинои 2 ошёнаи наву замонавии муҷаҳҳаз бо лавозимоти ҳозиразамони  таҷрибаомӯзӣ мавриди баҳрабардорӣ қарор дода шуд. Дар ин хусус ба АМИТ «Ховар» дар Донишгоҳи давлатии омӯзгории Тоҷикистон ба номи Садриддин Айнӣ иттилоъ доданд.

Иншооти нав дар Боғи «Агробиолабораторӣ»-и донишгоҳ бунёд гардида, барои баланд бардоштани корҳои таҷрибаомӯзии саҳроии донишҷӯёни факултаҳои география, биология ва химия пешбинӣ шудааст.

Маҷмааи нави таҷрибаомӯзии саҳроӣ аз 60 рахти хоб, 15 синфхона, аз ҷумла як маҷлисгоҳ, 2 утоқи корӣ, китобхонаву толори барҳавои хониш, ҳуҷраҳои корӣ ва ёрирасон барои омӯзгорону мутахассисони илмҳои биология, химия ва география иборат мебошад.

Толори маҷлисии иншоот дорои 120 ҷойи нишаст буда, барои гузаронидани ҳамоишу чорабиниҳои таҷрибаомӯзӣ мувофиқ мебошад.

Бинои нав ҳамчунин дорои ошхона бо 60 ҷой нишаст буда, дар оянда баҳри таҷрибаомӯзии донишҷӯён ва корҳои таҳқиқоти илмии омӯзгорон хидмат хоҳад намуд.

Иброз гардид, ки Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳамеша зимни суханронияҳо таъкид менамоянд, ки «баҳри беҳтар намудани сифати таълиму тарбият бояд беҳтарин шароитро фароҳам оварем, то ҷавонони донишманду ватандӯстро тарбият намоем».

Таъкид карда шуд, ки мақсад аз сохта ба истифода додани бинои муосири таҷрибаомӯзӣ ин, пеш аз ҳама, татбиқи дастуру ҳидоятҳои Сарвари давлат ва ҷалби бештари ҷавонону донишҷӯён ба илмомӯзӣ ва ҳамзамон баланд бардоштани сатҳи маърифати таҷрибаомӯзии донишҷӯёну мутахассисони оянда мебошад.

Ёдовар мешавем, ки қаблан иншоот валангор буд ва дар ҳолати садамавӣ қарор дошт. Дар асоси дастуру ҳидоятҳои Сарвари давлат муҳтарам Эмомалӣ Раҳмон ҷиҳати рушди соҳаи маориф ва муосиргардонии соҳа бо иқдом ва ташаббуси роҳбарияти Донишгоҳи давлатии омӯзгории Тоҷикистон ба номи Садриддин Айнӣ иншоот навсозӣ ва дар он шароити мусоиду таҷҳизоти муосир барои таҷрибаомӯзии донишҷӯён фароҳам оварда шудааст.

АКС: Донишгоҳи давлатии омӯзгории Тоҷикистон ба номи Садриддин Айнӣ