Дар Муассисаи таҳсилоти миёнаи умумии №21-и ноҳияи Рӯдакӣ сохтмони биноҳои нав оғоз гардид

РӮДАКӢ, 23.01.2024 /АМИТ «Ховар»/. Бо ибтикори Мақомоти иҷроияи ҳокимияти давлатии ноҳияи Рӯдакӣ ба ифтихори ҷашни 35-солагии Истиқлоли давлатӣ дар Ҷамоати деҳоти Султонобод сохтмони биноҳои филиалҳои  143-148-и Муассисаи таҳсилоти миёнаи умумии №21-и ноҳия оғоз гардид. Дар ин хусус  ба хабарнигори минтақавии АМИТ «Ховар» Субҳониддини Маҳмуд дар Мақомоти иҷроияи ҳокимияти давлатии ноҳияи Рӯдакӣ иттилоъ доданд.

Тибқи лоиҳа, биноҳои нав дар филиалҳои 143 ва 148 тибқи талаботи меъмориву сохтмонии муосир бунёд ёфта, бо тамоми шароити муосири таҳсил муҷаҳҳаз мешаванд.

Дар айни замон дар ин муассисаҳо мушкилоти нарасидани ҷойи нишаст мушоҳида мешавад. Ҳангоми сохта, ба истифода додани биноҳои нав мушкилии норасоии ҷойи нишаст дар филиалҳои 143-148-и Муассисаи таҳсилоти миёнаи умумии №21 бартараф мегардад.

Чунин тадбири созандагӣ ҷиҳати шароити хуб фароҳам овардан ба донишандӯзии хонандагон дар доираи сиёсати маорифпарваронаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон амалӣ мегардад.

АКС: Мақомоти иҷроияи ҳокимияти давлатии ноҳияи Рӯдакӣ