Дар ноҳияи Мастчоҳ ба маблағи беш аз 429 миллион сомонӣ маҳсулоти саноатӣ истеҳсол гардид

ДУШАНБЕ, 01.01.2024 /АМИТ «Ховар»/. Вобаста ба ҳадафи чаҳоруми стратегии мамлакат – рушди босуръати саноатикунонӣ дар корхонаҳои саноатии ноҳияи Мастчоҳ дар ёздаҳ моҳи соли равон ба маблағи 429 млн 180 ҳазор сомонӣ маҳсулот истеҳсол намудаанд, ки ин нисбат ба ҳамин давраи соли 2022 162 млн сомонӣ зиёд буда, 160,6 фоизро дар бар мегирад. Дар ин хусус зимни баргузории иҷлосияи ҳабдаҳуми Маҷлиси вакилони халқи ноҳия иттилоъ дода шуд.

Таъкид гардид, ки дар ноҳияи Мастчоҳ 4 лоиҳаи давлатии сармоягузорӣ мавриди амал қарор дорад. Маблағҳои умумии дар доираи татбиқи ин лоиҳаҳо дар ноҳия азхудшуда 1 млн 403 ҳазор доллари ИМА-ро ташкил медиҳанд.

Ҳамзамон дар давраи ҳисоботӣ маҳсулоти умумии соҳаи кишоварзӣ ба 1 млрд 452 млн 556 ҳазор сомонӣ расонида шуд, ки ин рақам 135,8 фоизи ҳамин давраи соли 2022-ро ташкил медиҳад.

АКС: Мақомоти иҷроияи ҳокимияти давлатии ноҳияи Мастчоҳ