Дар ноҳияи Муъминобод Муассисаи таҳсилоти миёнаи умумии №5 ифтитоҳ гардид
ДУШАНБЕ, 05.01.2024. /АМИТ «Ховар»/. Имрӯз зимни сафар ба шаҳру ноҳияҳои вилояти Хатлон Сарвазири Ҷумҳурии Тоҷикистон Қоҳир Расулзода дар ноҳияи Муъминобод Муассисаи таҳсилоти миёнаи умумии №5-ро ифтитоҳ намуд, хабар медиҳад АМИТ «Ховар» бо истинод ба Мақомоти иҷроияи ҳокимияти давлатии вилояти Хатлон.
Муассисаи таҳсилоти миёнаи умумии №5, воқеъ дар деҳаи Сангдараи Ҷамоати деҳоти ба номи Шамсиддини Шоҳин ҳанӯз соли 1960 таъсис ёфта буд. Дар гузашта дар муассиса толори варзишӣ, фарҳангӣ, ошхона ва майдончаҳои варзишӣ барои бозии футбол, волейбол ва баскетбол мавҷуд набуд. Ҳамаи деворҳои муассиса аз лой сохта шуда, дар масоҳати ниҳоят хурд ҷойгир гардида буд.
Дар ин муассиса бо назардошти афзуншавии теъдоди хонандагон ба 240 нафар ва рӯ ба афзоиш доштани шумораи аҳолии деҳа, ки ҳоло 2607 нафарро ташкил медиҳад, зарурат пеш омад, ки муассисаи нав сохта шавад.
Иттилоъ дода шуд, ки сохтмони Муассисаи таҳсилоти миёнаи умумии №5 аз тарафи фармоишгар Вазорати маориф ва илми Ҷумҳурии Тоҷикистон ва Бонки исломии рушди Осиё бо маблағгузории Бонки рушди исломӣ соли 2022 оғоз гардида, корҳои сохтмонӣ ва рангубори муассиса ба итмом расонида шуд.
Ин муассисаи таълимӣ аз ду ошёна иборат буда, барои 240 ҷой дар як баст, дар масоҳати 2,5 га бино гардидааст. Дар он ҳамагӣ 11 синфхона, аз ин 4 кабинети фаннӣ (компютер, физика, химия), ки бо тахтаҳои электронӣ ва воситаҳои аёнӣ ҷиҳозонида шудаанд, синфхонаҳои технологияи меҳнат барои писарон ва духтарон, утоқи кории директори муассиса бо қабулгоҳ, утоқи корӣ барои муовинони директор ва утоқи алоҳида барои муҳосибот мавҷуд мебошанд.
Муассисаи таълимӣ инчунин бо буғхонаи бо назардошти технологияи ҳозиразамон бо ангишт фаъолияткунанда, ки дар фасли зимистон имкони гарм нигоҳ доштани тамоми ҳуҷраҳоро дорад, таъмин шудааст.
Дар саҳни муассиса майдончаҳои варзишӣ барои бозии футбол, волейбол ва баскетбол омода шудаанд. Саҳни муассиса сафолакпӯш ва гулкорӣ шуда, дар масоҳати 320 м2 алафҳои ҳамешасабз, 80 бех ниҳолҳои ороишӣ, сояафкану мевадиҳанда шинонида шудаанд.
Сарвазири мамлакат бо омӯзгорону хонандагон суҳбат намуда, онҳоро ба хониши аъло ва таълиму тарбияи босифат даъват намуд. Омӯзгорону хонандагон аз ғамхориҳои беназири Сарвари маорифпарвари Тоҷикистон изҳори миннатдорӣ намуда, иброз доштанд, ки бо фароҳам гардидани чунин шароити муосир дар таълиму тарбия саҳми бештар мегузоранд.
Сарвазири мамлакат Қоҳир Расулзода ба масъулин ҷиҳати босифат анҷом додани корҳои сохтмонӣ изҳори сипос намуд.
АКС: Мақомоти иҷроияи ҳокимияти давлатии вилояти Хатлон
Дар Душанбе Рӯзҳои фарҳанги шаҳрҳои Истаравшан, Норак ва ноҳияҳои Фархор, Носири Хусрав, Ёвон, Мастчоҳ ва Дӯстӣ доир мегарданд
НИШАСТИ МАТБУОТӢ. Бахшида ба ҷашни 35-солагии Истиқлоли давлатӣ беш аз 31 ҳазор иншоот ба истифода дода шуд
Президенти Ҷумҳурии Тоҷикистон Эмомалӣ Раҳмон дар ноҳияи Деваштич хатти нави оби полезиро бо дарозии 12 километр мавриди истифода қарор доданд
Пешвои миллат Эмомалӣ Раҳмон дар ноҳияи Деваштич ба таври фосилавӣ 12 иншооти гуногунтаъйинотро ифтитоҳ намуданд
Сарвари давлат Эмомалӣ Раҳмон дар ноҳияи Деваштич бинои нави беморхонаи марказии №6-ро ба истифода доданд
Президенти Ҷумҳурии Тоҷикистон Эмомалӣ Раҳмон дар ноҳияи Шаҳристон бо лоиҳаи сармоягузорӣ барои бунёди комплекси сайёҳии Шаҳристон — эко резорт шинос шуданд
Пешвои миллат Эмомалӣ Раҳмон дар ноҳияи Шаҳристон тариқи фосилавӣ 7 иншооти иқтисодию иҷтимоиро мавриди истифода қарор доданд
Сарвари давлат Эмомалӣ Раҳмон ба ноҳияи Шаҳристон ташриф оварданд
Сарвазири Тоҷикистон дар ноҳияҳои вилояти Хатлон бо рафти корҳои созандагӣ шинос гардид
Президенти Ҷумҳурии Тоҷикистон Эмомалӣ Раҳмон дар ноҳияи Айнӣ ба таври фосилавӣ 10 иншоотро мавриди истифода қарор доданд
Пешвои миллат Эмомалӣ Раҳмон дар ноҳияи Айнӣ Корхонаи истеҳсоли сурмаро ифтитоҳ намуданд
Ба истиқболи 35-солагии Истиқлоли давлатӣ бинои беназир дар минтақа — Театри миллии Тоҷикистон ба истифода дода мешавад
