Дар ноҳияи Спитамен яхобмонии заминҳо идома дорад

ДУШАНБЕ, 21.01.2024. /АМИТ «Ховар»/. Дар заминҳои корхонаи кишоварзии БТК «ГРУПП»-и Федератсияи Русия дар ноҳияи Спитамен  яхобмонӣ бо маром идома дорад, иттилоъ медиҳад АМИТ «Ховар» бо истинод ба Хадамоти матбуоти Раиси вилояти Суғд.

Ба назари мутахассисон, дар ин рӯзҳо кишоварзон бояд ​ ба яхобмонӣ аҳамияти ҷиддӣ диҳанд. Яхобмонӣ тадбири муҳими агротехникӣ мебошад ва баъди шудгори заминҳо дар фасли сармо яхоб мондан боиси нобуд гаштани ҳашароти зараррасон мегардад.​

Ҳамчунин намнокии замин нигоҳ дошта шуда, баъди гузаронидани кишт зарурати обмонии зиёдатӣ бартараф мешавад. Ғайр аз ин дар давраи яхобмонӣ намаки замин паст шуда, боғу токзорро аз хунукзанӣ муҳофизат менамояд.​

Масъулин иттилоъ доданд, ки дар ҳамаи шаҳру ноҳияҳои вилояти Суғд бояд ба масъалаи яхобмонӣ таваҷуҳи зарурӣ равона гардад. Олимони соҳаи кишоварзӣ чунин мешуморанд, ки аҳамияти яхобмонӣ аз он иборат аст, ки об  дар бехи дарахтон захира шуда,  ба ин восита касалиҳои хок ва ҳар гуна  ҳашарот нобуд  мешаванд.

Манфиати яхобмонӣ дар он ифода меёбад, ки давраи гулкунии дарахтони мевадиҳанда, аз ҷумла бодом ва зардолу ба қафо партофта шуда, имконият медиҳад, ки дарахтон аз сардиҳои ногаҳонии баҳорӣ эмин монанд.

АКС: Хадамоти матбуоти Раиси вилояти Суғд