Соли 2023 ҳаҷми гардиши савдои хориҷии Тоҷикистон беш аз 90 миллиард сомониро ташкил дод

ДУШАНБЕ, 25.01.2024. /АМИТ «Ховар»/. Соли 2023 ҳаҷми гардиши  савдои хориҷии Тоҷикистон ба зиёда аз 90 миллиард сомонӣ баробар гардид. Ин омор дар суханронии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар маҷлиси васеи Ҳукумати мамлакат баён шуд.

Таъкид гардид, ки ҳаҷми содироти молу маҳсулот 25 миллиард сомониро ташкил дода, нисбат ба соли 2022 14,3 фоиз зиёд мебошад. Соли 2023 истеҳсол ва содироти маҳсулоти нимтайёр афзоиш ёфтааст.

«Таҳлилҳо нишон медиҳанд, ки 47 фоизи нишондиҳандаи содироти молҳо аз ҳисоби металлҳои қиматбаҳо ва 15,5 фоиз аз ҳисоби маъдану консентратҳо ташаккул ёфтааст, — тазаккур доданд Сарвари давлат. — Содироти маҳсулоти кишоварзӣ 286 ҳазор тоннаро ташкил додааст, аммо бо назардошти имконияти мавҷуда ин ҳоло ҳам нокифоя мебошад».

Дар идома иттилоъ дода шуд, ки соли 2023 содироти сабзавот ва полезиҳо нисбат ба соли 2022  15,5 ҳазор тонна, аз ҷумла пиёз 7 ҳазор, сабзӣ 5,6 ҳазор ва карам 2,6 ҳазор тонна кам гардидааст.

Содироти ин намуди маҳсулот аз вилояти Суғд 9,2 ҳазор тонна, вилояти Хатлон 3,6 ва шаҳру ноҳияҳои тобеи ҷумҳурӣ 2,7 ҳазор тонна кам шудааст.

Бинобар ин, Пешвои миллат вазоратҳои саноат ва технологияҳои нав, кишоварзӣ, рушди иқтисод ва савдо, молия, Агентии содирот ва вазорату идораҳои дигар, мақомоти иҷроияи маҳаллии ҳокимияти давлатиро муваззаф намуданд, ки ҷиҳати таъмин намудани рақобатнокии маҳсулоти асосии содиротӣ дар бозори ҷаҳонӣ тадбирҳои мушаххас андешанд.

АКС аз манбаъҳои боз