Соли 2023 донишҷўёни Донишгоҳи миллии Тоҷикистон Шоҳҷоизаҳои ду озмуни ҷумҳуриявиро сазовор гаштанд

ДУШАНБЕ, 31.01.2024. /АМИТ «Ховар»/. Соли 2023 донишҷўёну ҳайати омўзгорони Донишгоҳи миллии Тоҷикистон дар Озмуни ҷумҳуриявии «Фурӯғи субҳи доноӣ китоб аст» соҳиби 12 ҷой, аз ҷумла 3 ҷойи 1-ум, 7 ҷойи 2-юм, 1 ҷойи 3-юм гардиданд. Донишҷўи курси 3-юми факултети ҳуқуқшиносӣ Шукрона Тоҳирӣ Шоҳҷоизаи озмуни мазкурро ба даст овард. Дар озмуни мазкур Донишгоҳи миллии Тоҷикистон дар сатҳи ҷумҳурӣ аз ҳисоби ба даст овардони ҷойҳои ифтихорӣ сазовори ҷойи аввал гардид. Дар ин хусус зимни нишасти матбуотии Донишгоҳи миллии Тоҷикистон, ки 29 январ доир гардид, иттилоъ дода шуд.

Дар нишасти хабарӣ ҳамчунин гуфта шуд, ки дар озмуни «Тоҷикон» – оинаи таърихи миллат» ҳайати омўзгорон ва донишҷўёни Донишгоҳ фаъолона иштирок намуда, Шоҳҷоизаи озмуни мазкур насиби донишҷӯи курси 4-уми факултаи таърих Шоира Давлатзода гардид, ки ин ду комёбиро метавон муҳимтарин дастовард дар таърихи соҳибитиқлолии ҷумҳурӣ барои Донишгоҳи миллии Тоҷикистон номид. Ҳарду ғолиб бо Асосгузори сулҳу ваҳдати миллӣ–Пешвои миллат Президенти Ҷумҳурии Тоҷикистон муҳтарам Эмомалӣ Раҳмон зимни баргузории ҷаласаҳои ҳукуматӣ вохўрда, аз ҷониби Сарвари давлат ба онҳо барои ин комёбиҳо баҳои баланд дода шуд.

«Ҳамчунин дастаи донишҷўёни Донишгоҳ дар даври хотимавии Озмуни ҷумҳуриявии «Илм–фурӯғи маърифат» иштирок намуда, бо гирифтани 10 ҷойи ифтихорӣ (3 ҷойи аввал, 2 ҷойи дуюм ва 5 ҷойи сеюм) дар байни муассисаҳои таҳсилоти олии касбии мамлакат сазовори ҷойи аввал гардиданд»,- гуфта шуд дар нишаст.

АКС: АМИТ «Ховар»