Ҳайати Тоҷикистон дар Конфронси 13-уми вазирони давлатҳои аъзои Созмони ҷаҳонии савдо дар Абузабӣ иштирок намуд

ДУШАНБЕ, 27.02.2024 /АМИТ «Ховар»/. Ҳайати Ҷумҳурии Тоҷикистон таҳти роҳбарии Вазири рушди иқтисод ва савдои ҷумҳурӣ Завқӣ Завқизода дар маросими ифтитоҳи Конфронси 13-уми вазирони давлатҳои аъзои Созмони ҷаҳонии савдо (СҶС) дар шаҳри Абузабии Амороти Муттаҳидаи Араб иштирок намуд.

АМИТ «Ховар» бо истинод ба Вазорати рушди иқтисоди ҷумҳурӣ иттилоъ медиҳад, ки Завқӣ Завқизода вобаста ба дастовардҳои Тоҷикистон дар давраи узвият дар созмон, мавқеи ҷумҳурӣ оид ба вазъи тиҷорати глобалӣ, бахусус ислоҳот дар Созмони ҷаҳонии савдо ва такмили низоми савдои бисёрҷониба ибрози назар намуд.

Гуфта шуд, ки дар натиҷаи тадбирҳои андешида дар солҳои 2013-2023 дар давраи узвият дар Созмони ҷаҳонии савдо Тоҷикистон ба дастовардҳои назаррас ноил гардида, рушди миёнасолонаи иқтисодиро дар сатҳи 7,2 фоиз таъмин намуд ва шумораи шарикони тиҷоратиро то ба 120 давлат афзоиш дод.

Таъкид шуд, ки Президенти Ҷумҳурии Тоҷикистон муҳтарам Эмомалӣ Раҳмон тақвияти иқтидори содиротӣ, диверсификатсияи содирот ва содагардонии расмиёти савдоро самтҳои афзалиятноки сиёсати иқтисодии Ҳукумати мамлакат дар соҳаи савдо муайян намудаанд.

Вазирони давлатҳо масъалаҳои марбут ба ислоҳоти Созмони ҷаҳонии савдо, кишоварзӣ ва амнияти озуқаворӣ, субсидияи моҳидорӣ, савдо ва устувории муҳити зист, тасдиқи Созишнома оид ба содагардонии сармоягузорӣ барои рушд ва Барномаи кории созмон оид ба тиҷорати электрониро мавриди муҳокимаи ҳаматарафа қарор доданд.

Ҳамзамон дар конфронс масъалаи ҳамроҳшавии давлатҳо ба Созмони ҷаҳонии савдо баррасӣ шуда, Протоколи пайвастани давлатҳои Коморос ва Тимор-Лесте қабул шуд. Баъди гузаронидани расмиёти дохилидавлатӣ онҳо расман аъзои Созмони ҷаҳонии савдо мегарданд ва дар натиҷа шумораи давлатҳои аъзои ин созмон аз 164 то ба 166 давлат зиёд мешавад.

Дар конфронс Валиаҳди Абузабӣ, Раиси Шурои иҷроияи Абузабӣ, Волоҳазрат Шайх Холид бин Муҳаммад бин Зойид Оли Наҳён, вазирони давлатҳои аъзо, роҳбарияти Созмони ҷаҳонии савдо ва намояндагони давлатҳои нозир, инчунин созмонҳои байналмилалии иқтисодию молиявии муқими Амороти Муттаҳидаи Араб иштирок намуданд.

Конфронси вазирони давлатҳои аъзои Созмони ҷаҳонии савдо мақоми олии роҳбарикунанда буда, қарорҳои муҳими марбут ба савдои ҷаҳониро баррасӣ ва қабул менамояд, инчунин тибқи муқаррароти созмон ин чорабинӣ дар ду сол як маротиба баргузор мегардад.

Дар охири конфронс бо мақсади тақвияти ҳамкории тиҷоратию иқтисодӣ, бартараф намудани мушкилоти мавҷуда ва густариши низоми савдои бисёрҷониба якчанд ташаббус ва эъломияҳои муштараки ҷаҳонӣ қабул гардиданд.

АКС: Вазорати рушди иқтисод ва савдои Ҷумҳурии Тоҷикистон