Ҳамкории Кумитаи таҳсилоти ибтидоӣ ва миёнаи касбии Тоҷикистон ва Донишгоҳи давлатии Пензаи Русия густариш меёбад

ДУШАНБЕ, 23.02.2024 /АМИТ «Ховар»/. Раиси Кумитаи таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон Фарҳод Раҳимӣ бо намояндагони Донишгоҳи давлатии Пензаи Федератсияи Русия -проректор оид ба корҳои байналмилалӣ Глеб Синтсов ва директори Институти политехникии Донишгоҳи давлатии Пенза Геннадий Козлов мулоқот намуд.

Тавре ба АМИТ «Ховар» дар шуъбаи робитаҳои байналмилалии ин кумита хабар доданд, дар мулоқот ҷонибҳо оид ба самтҳои афзалиятноки ҳамкорӣ табодули афкор намуданд.

Иброз гардид, ки ҷалби довталабони тоҷик ба Донишгоҳи давлатии Пенза барои ихтисосҳои муҳандисию омӯзгорӣ пас аз хатми муассисаҳои таҳсилоти миёнаи касбии Тоҷикистон мувофиқи мақсад ҳисобида мешавад.

Ҳамчунин табодули омӯзгорону донишҷӯён, ташкили барномаҳои илмию фарҳангӣ, баргузории машварату конфронсҳои муштарак низ судманд арзёбӣ гардид.

Ҷонибҳо омодагиашонро вобаста ба ташкил ва таҳкими ҳамкории муштарак изҳор намуданд.  Дар ин замина оид ба омода намудани лоиҳаи созишномаи муштараки ҳамкорӣ ва омода намудани кадрҳои баландихтисос мувофиқа  ҳосил шуд.

АКС: Кумитаи таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон