Дар Хуросон дар мавзуи «Сиёсишавии дин ҳамчун омили пайдоиши гурӯҳҳои динӣ – ифротӣ ва роҳҳои пешгирии он дар ҷомеаи Тоҷикистон» ҷаласа доир шуд

ДУШАНБЕ, 27.02.2024 /АМИТ«Ховар»/. Дар Мақомоти иҷроияи ҳокимияти давлатии ноҳияи Хуросон ҷаласаи сайёри Шурои ҷамъиятии Ҷумҳурии Тоҷикистон дар мавзуи «Сиёсишавии дин ҳамчун омили пайдоиши гурӯҳҳои динӣ – ифротӣ ва роҳҳои пешгирии он дар ҷомеаи Тоҷикистон» бо иштироки ҳайатҳои аъзои шуроҳои ҷамъиятии шаҳри Бохтар, ноҳияҳои Ҷайҳун, Ёвон, Хуросон, Абдураҳмони Ҷомӣ, Кушониён, Вахш, Ҷалолуддини Балхӣ, Қубодиён, Носири Хусрав, Панҷ, Дӯстӣ, Шаҳритус, намояндагони ҳизбҳои сиёсӣ, ташкилоти ҷамъиятӣ, ходимони дин, собиқадорони меҳнат ва фаъолони ҷамъиятӣ баргузор гардид. Дар ин хусус ба АМИТ «Ховар» дар Шурои ҷамъиятии  Ҷумҳурии Тоҷикистон хабар доданд.

Дар ҷаласа таъкид шуд, ки дар шароити инкишофи давлатдории дунявӣ раванди сиёсишавии дин ҳамчун омили таҳдидбарангез ва хатарзо ба амнияти миллӣ эътироф мегардад.

Президенти Ҷумҳурии Тоҷикистон муҳтарам Эмомалӣ Раҳмон борҳо иброз намуданд, ки солҳои охир мушкилоти сиёсишавии дин дар мамлакат хеле авҷ гирифтааст, ки пайдоиши гурӯҳҳои динӣ-ифротӣ натиҷаи ҳамин раванд мебошад. Ин ҳам ба омилҳои дохилие, ки боиси бесуботии сиёсӣ гардидаанд ва ҳам ба таъсири берунии давлатҳо ва ташкилоте, ки ба ноором кардани вазъи сиёсӣ дар қаламрави Тоҷикистон манфиатдор ҳастанд, алоқаманд аст.

Масъалаи таъмини амнияти миллии Ҷумҳурии Тоҷикистон дорои хусусияти мураккабу гуногунҷанба буда, ба зарурати ҳифзи шахсият, ҷомеа ва давлат аз таҳдидҳои берунӣ ва дохилӣ дар тамоми соҳаҳои ҳаёт равона шудааст.

Мутобиқи Консепсияи ягонаи Ҷумҳурии Тоҷикистон оид ба мубориза бо ҳама гуна таҳдиду хатарҳо ба амният ва суботи сиёсии давлат Ҷумҳурии Тоҷикистон мубориза бо терроризм ва экстремизмро омили асосии мубориза бо хатару таҳдидҳо ба амнияти миллӣ медонад.

Гуфта шуд, ки имрӯзҳо ташкилоти экстремистию террористии наҳзатиҳо, ки дар хориҷи ҷумҳурӣ қарор доранд, аз дини мубини ислом суиистифода намуда, мақсад доранд, ки раванди сулҳу оромӣ, суботи сиёсӣ ва ваҳдати миллии моро халалдор намоянд. Бинобар ин ходимони дин бояд байни мардум ҳамаҷониба корҳои фаҳмондадиҳӣ гузаронанд, то миллати тоҷик зери парчами миллӣ сарҷамъ бошанд, ба қадри истиқлолияти давлатӣ ва арзишҳои миллӣ  бирасанд ва якҷо таҳти роҳбарии оқилона ва дурандешонаи Президенти Ҷумҳурии Тоҷикистон муҳтарам Эмомалӣ Раҳмон Ватанро   обод намоянд.

АКС: Шуъбаи иттилоотию таҳлилии дастгоҳи раиси вилояти Хатлон