Дар Вазорати молияи Тоҷикистон барои маблағгузории лоиҳаи «Таҷдиди зеристгоҳи Суғд-500» созишномаҳо ба имзо расиданд

ДУШАНБЕ, 28.02.2024 /АМИТ «Ховар»/. Байни Ҷумҳурии Тоҷикистон ва Бонки аврупоии таҷдид ва рушд созишномаҳои қарзӣ, грантӣ ва лоиҳавӣ барои маблағгузории лоиҳаи «Таҷдиди зеристгоҳи Суғд-500» ба имзо расиданд, хабар доданд ба АМИТ «Ховар» дар Вазорати молияи Ҷумҳурии Тоҷикистон.

Созишномаҳо имрӯз дар Вазорати молияи Тоҷикистон  аз ҷониби Вазири молия Файзиддин Қаҳҳорзода ва Роҳбари намояндагии Бонки аврупоии таҷдид ва рушд дар Ҷумҳурии Тоҷикистон Ҳолгер Вифел ба имзо расонида шуданд.

Ҳадафи татбиқи лоиҳа ин таҷдид намудани системаи интиқоли неруи барқ, таъмини устувории хатҳои интиқоли барқ, паст кардани талафоти неруи барқ ва такмили таъминоти он дар минтақаҳои шимоли ҷумҳурӣ мебошад.

Маблағи созишномаҳои мазкур 35 миллиону 400 ҳазор евроро ташкил намуда, аз он 23 миллион евро қарз, 10 миллион евро грант ва 2 миллиону 400 ҳазор евро кумаки техникӣ мебошад.

АКС: Вазорати молияи Ҷумҳурии Тоҷикистон