НИШАСТИ МАТБУОТӢ. Дар шаҳри Ваҳдат 808 иншооти гуногун бунёду навсозӣ мешавад

ДУШАНБЕ, 10.02.2024 /АМИТ «Ховар»/. Ба муносибати ҷашни 35-солагии Истиқлоли давлатии Ҷумҳурии Тоҷикистон дар ҳудуди шаҳри Ваҳдат бояд 808 иншооти мухталиф бунёд, таҷдид ва таъмир шуда, мавриди истифода қарор дода шаванд. Дар ин хусус зимни нишасти матбуотӣ Раиси шаҳри Ваҳдат  Мирзо Исмоилзода  иттилоъ дод.

 Тазаккур дода шуд, ки то ин давра аз ҷониби соҳибкорон, саховатмандон ва аҳолии шаҳр 222 иншоот, аз ҷумла 12 корхонаи саноатӣ, 20 иншооти тандурустӣ, 31 иншооти соҳаи маориф, 2 иншооти варзишӣ, 1 иншооти истироҳатию фароғатӣ, 72 иншооти хизматрасонӣ, 30 иншооти савдою хӯроки умумӣ, 9 бинои истиқоматӣ, 3 бинои маъмурӣ ва 20 иншооти дигар сохта шуда, 37 километр  роҳ ва 13 пул таъмир шуд, ки ба 27,5 фоизи нақша баробар мебошад.

Соли 2024 мақомоти иҷроияи ҳокимияти давлатии шаҳр  тамоми неруи созандаро ба амалӣ гардидани иҷрои нишондиҳандаҳо ва самтҳои асосии Паёми Президенти Ҷумҳурии Тоҷикистон ба Маҷлиси Олии Ҷумҳурии Тоҷикистон ва дигар ҳадафҳои стратегии мамлакат, бахусус стратегияҳо, барномаҳо, дурнамоҳо, нақшаҳо ва дастуру супоришҳои Ҳукумати Ҷумҳурии Тоҷикистон равон менамояд.

АКС аз манбаъҳои боз