Ҷаласаи 5-уми Гурӯҳи кории техникӣ оид ба воридкунии ваксина бар зидди вируси папилломаи одам дар Тоҷикистон баргузор шуд

ДУШАНБЕ, 09.03.2024 /АМИТ «Ховар»/. Дар Вазорати тандурустӣ ва ҳифзи иҷтимоии аҳолии Ҷумҳурии Тоҷикистон таҳти роҳбари муовини якуми вазир Ғафур Муҳсинзода ҷаласаи 5-уми Гурӯҳи кории техникӣ оид ба воридкунии ваксина бар зидди вируси папилломаи одам дар  Ҷумҳурии Тоҷикистон баргузор гардид, хабар медиҳад АМИТ «Ховар» бо истинод ба ин вазорат.

Дар ҷаласа иброз гардид, ки бо мақсади пешгирӣ намудани гардиши вируси папилломаи одам, ки сабабгори асосии гирифторӣ ба бемории саратони гарданаки бачадони занҳо мегардад, Вазорати тандурустӣ ва ҳифзи иҷтимоии аҳолии Ҷумҳурии Тоҷикистон тасмим гирифт, ки ваксина бар зидди вируси папилломаи одамро ба Тақвими миллии иммунизатсия ворид намояд. Бо ин мақсад дар назди Вазорати тандурустӣ ва ҳифзи иҷтимоии аҳолӣ Гурӯҳи кории техникӣ таъсис дода шуд.

Давоми моҳҳои феврал то майи соли 2023 Гурӯҳи корӣ ҳуҷҷати асосноккуниро оид ба моҳияти ворид намудани ваксина бар зидди вируси папилломаи одам дар Ҷумҳурии Тоҷикистон омода намуда, онро барои қабул ба Гурӯҳи миллии техникию машваратӣ оид ба иммунизатсия пешниҳод намуд.

Баъд аз омӯзиш ва таҳлили ҳуҷҷати асосноккунӣ Гурӯҳи миллии техникию машваратӣ оид ба иммунизатсия барои зарурати воридкунии ваксина бар зидди вируси папилломаи одам ба Тақвими миллии иммунизатсия қарор бароварда, ба вазорат пешниҳод намуд.

Бояд гуфт, ки бо дастгирии машваратчиёни Созмони ҷаҳонии тандурустӣ дархости ҷумҳурӣ оид ба ворид намудани ваксина бар зидди вируси папилломаи одам ба Ҷумҳурии Тоҷикистон омода шуда, 17 июли соли 2023 барои дастгирӣ ба котиботи Алянси глобалии ваксинаҳо ва иммунизатсия пешниҳод гардид.

Дар асоси ин дархост Вазорати тандурустӣ ва ҳифзи иҷтимоии аҳолӣ тасмим гирифтааст, ки баъд аз ворид намудани ваксина иммунизатсияи нақшавии онро байни духтарони 10-сола гузаронад.

Дар баробари ворид намудани ваксина ба нақша гирифта шудааст, ки рӯзҳои иммунизатсияи оммавӣ бар зидди вируси папилломаи одам байни духтарони аз 11 то 15-солаи ҷумҳурӣ низ гузаронида шавад.

Дар асоси натиҷаҳои бадастоварда вазорат дар якҷоягӣ бо Созмони ҷаҳонии тандурустӣ ба нақша гирифтаанд, ки «Нақшаи омодабоширо барои ворид намудани ваксина бар зидди вируси папилломаи одам ба Ҷумҳурии Тоҷикистон» то ворид намудани ваксина омода намоянд.

Барои дар сатҳи баланд гузаронидани чорабиниҳои омодабошӣ барои ворид намудани ваксина бар зидди вируси папилломаи одам ба ҷумҳурӣ ва гузаронидани рӯзҳои иммунизатсияи оммавӣ бар зидди вируси папилломаи одам якчанд чорабиниҳо ба нақша гирифта шудаанд.

АКС: Вазорати тандурустӣ ва ҳифзи иҷтимоии аҳолии Ҷумҳурии Тоҷикистон