Бунафша Файзиддинзода дар доираи иштирок дар ҷаласаи 68-уми Комиссия оид ба мақоми зан бо занони тоҷики муқими Ню-Йорк мулоқот намуд

ДУШАНБЕ, 16.03.2024 /АМИТ «Ховар»/. Ҳайати Ҷумҳурии Тоҷикистон таҳти роҳбарии Раиси Кумитаи кор бо занон ва оилаи назди Ҳукумати Ҷумҳурии Тоҷикистон Бунафша Файзиддинзода дар ҷаласаи 68-уми Комиссия оид ба мақоми зан (CSW-68), ки дар қароргоҳи Созмони Милали Муттаҳид (СММ) дар шаҳри Ню-Йорки Иёлоти Муттаҳидаи Амрико баргузор гардид, иштирок намуд. Дар ин хусус АМИТ «Ховар» бо истинод ба Намояндагии доимии Ҷумҳурии Тоҷикистон дар Созмони Милали Муттаҳид хабар медиҳад.

11 март роҳбари ҳайати Тоҷикистон дар қисмати ифтитоҳии ҷаласа ва чорабинии канории Созмони ҳамкории исломӣ зери унвони «Таъмини тавонмандии оилаҳо барои рушди устувор: таҷрибаҳои пешқадам дар ҳимояи ҳуқуқи башар, занон ва духтарон» иштирок ва суханронӣ намуд.

14 март Бунафша Файзиддинзода дар мубоҳисаҳои умумии иҷлоси 68-уми Комиссия оид ба мақоми зан сухан гуфта, таъкид кард, ки Ҳукумати Ҷумҳурии Тоҷикистон бо сарварии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба масъалаи баланд бардоштани мақоми зан, дастгирии пайвастаи ташаббусҳои созанда ва шароити мусоид барои ноил шудан ба сатҳи баробарии гендерӣ таваҷҷуҳи хоса зоҳир менамояд.

Тазаккур дода шуд, ки солҳои охир аз ҷониби Ҳукумати Ҷумҳурии Тоҷикистон ҷиҳати таҳкими мақоми зан дар ҷомеа ва баланд бардоштани нақши онҳо тадбирҳои назаррас андешида мешавад. Тасдиқ ва қабули як қатор санадҳои меъёрии ҳуқуқӣ, инчунин татбиқи ҳуҷҷатҳои муҳими стратегӣ, ки ба баланд бардоштани иштироки фаъолонаи занон дар арсаҳои иқтисодӣ, сиёсӣ ва иҷтимоӣ нигаронида шудаанд, далели ин гуфтаҳо мебошанд.

Ҳамзамон иброз гардид, ки Ҷумҳурии Тоҷикистон муаллифи аксари ташаббусҳо ва қатъномаҳои Созмони Милали Муттаҳид оид ба масълаи об мебошад ва бо ишора ба қатъномаи «Даҳсолаи байналмилалии амал «Об барои рушди устувор», солҳои 2018-2028» иштирокдорони иҷлосия даъват гардиданд, ки дар Конфронси 3-юми байналмилалии сатҳи баланд оид ба Даҳсолаи байналмилалии амал «Об барои рушди устувор», солҳои 2018-2028, ки 10-13 июни соли равон дар шаҳри Душанбе баргузор хоҳад шуд, фаъолона иштирок намоянд.

Иттилоъ дода шуд, ки яке аз форумҳои пеш аз конфронси мазкур баргузоршаванда ба мавзуи «Зан ва об» бахшида мешавад.

Инчунин дар ҳошияи чорабинии мазкур вохӯрии Раиси Кумита кор бо занон ва оила бо мудири иҷроияи Сохтори Созмони Милали Муттаҳид оид ба баробарии гендерӣ ва тавондмандсозии занон (СММ-Занон) ва муовини Дабири кулли Созмони Милали Муттаҳид Сима Сами Баҳус барпо гардид.

Дар вохӯрӣ ҷонибҳо оид ба густариши ҳамкории Тоҷикистон ва ниҳоди Созмони Милали Муттаҳид -Занон табодули афкор намуданд. Мусоҳибон аҳаммияти ҳамкории муштаракро барои пешбурди баробарии гендерӣ ва тавонмандсозии иқтисодии занон таъкид намуда, имкони баргузории чорабиниҳои муштаракро вобаста ба нақши занон, баробарии гендерӣ ва тавонмандсозии занон баррасӣ карданд.

Бояд гуфт, ки 68-умин Комиссия оид ба мақоми зан (CSW-68) бузургтарин ҳамоиши солонаи Созмони Милали Муттаҳид оид ба баробарии гендерӣ ва тавонмандсозии занон, имсол аз 11 то 22 март дар қароргоҳи Созмони Милали Муттаҳид дар шаҳри Ню-Йорк таҳти мавзӯи «Тезонидани ноилшавӣ ба баробарии гендерӣ ва тавонмандсозии ҳамаи занону духтарон тавассути ҳалли мушкилоти камбизоатӣ ва таҳкими институтҳо ва маблағгузорӣ бо дурнамои гендерӣ», баргузор мешавад.

Ҳамзамон бо ташаббуси Намояндагии доимии Ҷумҳурии Тоҷикистон дар Созмони Милали Муттаҳид мулоқоти Раиси Кумитаи кор бо занон ва оилаи назди Ҳукумати Ҷумҳурии Тоҷикистон Бунафша Файзиддинзода бо занони тоҷики муқими Ню-Йорк баргузор гардид.

Зимни ҷаласа Бунафша Файзиддинзода ғамхорӣ ва дастгирии ҳамешагии Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Ҳукумати мамлакатро ҷиҳати баланд бардоштани мақоми занон дар ҳаёти ҷомеа бо овардани далелҳои мутамад ва мисолҳои зиёд ёдовар шуд.

Илова бар ин, раиси Кумитаи кор бо занон ва оила аҳаммияти ҳамбастагии занони тоҷик дар хориҷаро барои баланд бардоштани ҳуввияти миллӣ, тарбияи насли наврас дар руҳияи ватандустӣ ва таҳкими ҷанбаҳои ахлоқии ҷомеа таъкид намуд.

Инчунин иштирокдорони мулоқот таъсис ва баргузор намудани вохӯриҳои мунтазами гурӯҳи занони тоҷики муқими Ню-Йоркро баҳри ҳифзи арзишҳои миллӣ муҳим арзёбӣ намуданд.

София ШОИК,
АМИТ «Ховар»

АКС: Намояндагии доимии Ҷумҳурии Тоҷикистон дар Созмони Милали Муттаҳид