Дар Хоруғ озмуни «Расми беҳтарин дар мавзуи бехатарӣ аз сӯхтор» баргузор гардид
ХОРУҒ, 03.03.2024 /АМИТ «Ховар»/. Дар шаҳри Хоруғ бо ибтикори шуъбаи Хадамоти давлатии оташнишонии Вилояти Мухтори Кӯҳистони Бадахшон озмуни шаҳрии «Расми беҳтарин дар мавзуи бехатарӣ аз сӯхтор» баргузор гардид, ки дар он зиёда аз 70 довталаб иштирок намуд, хабар медиҳад хабарнигори минтақавии АМИТ «Ховар» Файз Мирасан.
Сардори қисми мустақили 16-уми Хадамоти оташнишонӣ оид ба муҳофизати шаҳри Хоруғ Саидюсуф Перуззода зимни шарҳу тавзеҳи мақсаду шартҳои ин озмун бори дигар ба довталабон хотиррасон намуд, ки ҳадафи асосии озмун пешгирию бартараф намудани оқибатҳои сӯхтор ва риояи қоидаҳои бехатарӣ аз сӯхтор мебошад. Озмун бо мақсади муайян намудани дониш, истеъдод ва малакаву маҳорати кӯдакону наврасон доир ба қоидаҳои бехатарӣ аз сӯхтор доир шуд. Хурсандиовар аст, ки сол аз сол довталабони ин озмун дар муассисаҳои таълимии шаҳр бештар мегарданд. Агар дар соли аввал дар озмун ҳамагӣ аз 10 то 20 нафар иштирок менамуд, имрӯз теъдодашон то 70 нафар расидааст.
Аксарияти расмҳои кӯдакон аз ҷиҳати мазмуну моҳият ба талабот ҷавобгӯ буданд ва рассомони наврас ҳам онҳоро бо забони бурро ва бо шавқу завқ шарҳ доданд. Аз ҳама муҳим, аксарияташон дар бораи қоидаҳои бехатарӣ аз сӯхтор маълумоти кофӣ доштанд ва бо истифода аз ин маълумот тахайюлоташонро рӯи қоғаз оварда, моҳияти онро ба таври комил тавзеҳ доданд.
Саидюсуф Перуззода гуфт, ки дар баробари доштани дониши назариявӣ хонандагон дар ин озмун бо расмҳои кашидаашон собит сохтанд, ки онҳо дар амал низ метавонанд қабл аз омадани оташнишонон ба ҳамсолонашон кумак расонанд. Баъзе аз довталабон ба озмун ихтирооташонро пешниҳод намуданд. Ин наврасон, ки чандин бор бо бинои шуъбаи Хадамоти оташнишонии вилоят шинос шудаанд, аз фаъолияти оташнишонон огоҳ мебошанд ва аз ин рӯ назар ба ҳамсолони дигари худ қоидаҳои бехатарӣ аз сӯхторро дар тасовир ва ихтирооташон возеҳтар инъикос кардаанд.
Ҳамин тавр, ҳайати ҳакамон ғолибонро муайян намуда, барои бештар ҳавасманд намудани онҳо ба корҳои минбаъдаи эҷодӣ бо ифтихорнома ва мукофоти пулӣ сарфароз гардонданд. Ғолибони озмуни шаҳрӣ акнун лаёқату маҳораташонро дар озмуни вилоятӣ нишон медиҳанд.
АКС: АМИТ «Ховар»
Бахшида ба Рӯзи Ваҳдати миллӣ дар ҶДММ «Бозори Корвон плюс» вохӯрӣ доир шуд
Интернет барои идора: чӣ тавр метавон кормандонро бо дастрасии боэътимод таъмин кард
Имрӯз дар водиҳои Тоҷикистон ҳаво то 39 дараҷа гарм мешавад
Сокинони ноҳияи Лахш имсол дар майдони 5552 гектар картошка шинонданд
Имрӯз дар шаҳри Душанбе ҳаво то 35 дараҷа гарм мешавад
Ваҳдати миллӣ асоси татбиқи ҳадафҳои стратегӣ дар солҳои соҳибистиқлолӣ мебошад
Созишномаи умумии истиқрори сулҳ ва ризоияти миллӣ дар Тоҷикистон яке аз муҳимтарин дастовардҳои байналмилалӣ-ҳуқуқии охири асри XX ба ҳисоб меравад
Номи «пиряхи Ванҷях» ба «пиряхи Тоҷикистон» иваз карда шуд
Имрӯз дар баъзе ноҳияҳои кӯҳии Тоҷикистон борони кӯтоҳмуддат меборад
Дар Бохтар таҳти унвони «Номи неки қаҳрамонон ҷовидон мемонад» конференсияи илмӣ-амалӣ баргузор шуд
САҲМИ МАН ДАР ШАҲРИ МАН. Дар панҷ моҳи соли равон дар пойтахт 37 маротиба аксияи «Тозагии соҳил» ва 34 маротиба аксияи «Тозагии маҳал» доир гардид
Дар Испания шумораи рекордии фавт аз гармӣ ба қайд гирифта шуд
