Дар Исфара дар майдони Парчами давлатӣ ниҳолҳои сояафкан шинонида шуданд

СУҒД, 10.03.2024 /АМИТ «Ховар»/. Дар шаҳри Исфара дар майдони Парчами давлатии Ҷумҳурии Тоҷикистон бо мақсади тақвияти корҳои ободониву хуррамгардонӣ бо иштироки Раиси вилояти Суғд ниҳолҳои сояафкан шинонида шуданд. Дар ин хусус АМИТ «Ховар» бо истинод ба Хадамоти матбуоти Раиси вилояти Суғд хабар медиҳад.

Ин иқдом дар рӯзҳои аввали баҳор доир шуда, ифодагари сарсабзиву шукуфоии ҷумҳурӣ ва талқинкунандаи ободкориву тоза нигоҳ доштани муҳити атроф мебошад.

Мардуми Исфара тасмим гирифтаанд, ки бо мақсади ободу хуррам гардонидани кӯчаву хиёбонҳо корҳои ниҳолшинониро вусъат бахшанд. Зеро хуб дарк намудаанд, ки мутобиқи ҳидоятҳои Президенти мамлакат муҳтарам Эмомалӣ Раҳмон ба макони боз ҳам зебову дилнишин мубаддал гардонидани Исфара ва зеббахшии он бо намудҳои гуногуни дарахтони ороишию гулу буттаҳои зебо ва ба саломатии инсон фоидаовар ба рушди соҳаи сайёҳӣ такони ҷиддӣ мебахшад.

Раиси вилоят ба роҳбарияти шаҳр барои тақвияти корҳои ободониву бунёдкорӣ, сарсабзу зебо намудани кӯчаву хиёбонҳои шаҳр ва тозаву озода нигоҳ доштани муҳити зист дастуру супоришҳо дод.

АКС: Хадамоти матбуоти Раиси вилояти Суғд