ФУТБОЛ. Дастаи олимпии Тоҷикистон (U-23) ба қисми ниҳоии Ҷоми Осиё-2024 омодагӣ мегирад

ДУШАНБЕ, 19.03.2024 /АМИТ «Ховар»/. Дастаи олимпии Тоҷикистон (U-23) оид ба футбол дар Душанбе омодагиро ба қисми ниҳоии Ҷоми Осиё-2024, ки аз 15 апрел то 3 май дар Қатар баргузор мешавад, оғоз намуд. Дар ин хусус АМИТ «Ховар» бо истинод ба Федератсияи футболи Тоҷикистон хабар медиҳад.

 Сармураббии тими олимпии мамлакат Мубин Эргашев 26 бозигарро ба ҷамъомади тамринии Душанбе даъват намудааст.  Ба ҳайати даста чанд бозигари нав ҳамроҳ шуданд, аз ҷумла ҳимоятгарон Денис Першин («Арсенал-2», Русия), Даниил Алимов («Динамо» Владивосток, Русия), нимҳимоятгарон Ансор Ҳабибов («Арсенал», Русия), Ҷомӣ Назаров («CP Sarria», Испания), ҳамлагарон Меҳрон Мадаминов («Истиқлол») ва Одилҷони Анӯшервонӣ («TУС Диткерхен», Олмон).

Дастаи мунтахаби олимпии Тоҷикистон (U-23) бо ҳамсолонаш аз Ветнам ду бозии дӯстона анҷом медиҳад. Ин вохӯриҳо 20 ва 23 март дар Варзишгоҳи марказии Душанбе баргузор мешаванд.

Бояд гуфт, ки дар Ҷоми Осиё-2024 байни дастаҳои то 23-сола дастаи Тоҷикистон дар гурӯҳи «С» бо дастаҳои мунтахаби Арабистони Саудӣ (16 апрел), Ироқ (19 апрел) ва Тайиланд (22 апрел) неру месанҷад.

АКС: Федератсияи футболи Тоҷикистон