Ҳоҷагидорони Кооперативи истеҳсолии «Сомон-Бохтар»-и ноҳияи Кӯшониён майдони парвариши лимӯро васеъ менамоянд

ДУШАНБЕ, 26.03.2024. /АМИТ «Ховар»/. Соли 2023 дар гармхонаи Кооперативи истеҳсолии «Сомон-Бохтар»— и ноҳияи Кӯшониён 50 тонна лимӯ ҷамъоварӣ гардид, ки он дар муқоиса ба соли 2022  (40 тонна)  10 тонна зиёд мебошад. Муассиси хоҷагии мазкур  ба нақша гирифтааст, ки дар майдони 2,0 гектар барои парвариши лимӯ гармхонаи нав бунёд намояд, хабар медиҳад  мухбири АМИТ «Ховар».

Роҳбари хоҷагӣ Маҳмадтолиб Ҷобирзода иброз дошт, ки   ба сохтмони  гармхона аз соли 2012 оғоз намуда, соли 2016   онро ба истифода  доданд.  Дар хоҷагӣ  10 гармхона бунёд шудааст, ки дар онҳо 6 нафар сокини маҳаллӣ бо ҷойи кори доимӣ таъмин гардиданд. Даромади хоҷагӣ аз ҳисоби гармхона аз 300 то 400 ҳазор сомониро ташкил медиҳад.

Хоҷагидорон ҳосили лимӯро  ба бозорҳои мамлакат ба фурӯш бароварда,  ҳамчунин  ба Федератсияи Русия содирот менамоянд.

Муассиси хоҷагӣ ба нақша гирифтааст, ки дар 3,0 гектар гармхонаҳои доимоамалкунанда бунёд намуда, аз ҷумла дар майдони 2,0 гектар лимӯ ва дар майдони 1,0 гектар сабзавоти барвақтӣ кишт намояд.

Кооперативи истеҳсолии «Сомон-Бохтар» дар масоҳати 50 гектар таъсис ёфта, майдони 3 гектарро боғ, 30 гектар пахта, 8 гектар ғалладонагиҳо, 1,5 гектар картошка ва 3,9 гектарро замини кишти хӯроки чорво ташкил медиҳад.

АКС: АМИТ «Ховар»