«САҲМИ ЗАНОН-МОДАРОНИ ТОҶИК ДАР РУШДИ ВАРЗИШИ КАСБӢ». Таҳти ин унвон дар шаҳри Душанбе ҳамоиш доир шуд

ДУШАНБЕ, 08.03.2024. /АМИТ «Ховар»/. Бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар Кумитаи миллии олимпии Тоҷикистон таҳти унвони «Саҳми занон-модарони тоҷик дар рушди варзиши касбӣ» ҳамоиши тантанавӣ доир шуд, хабар доданд ба АМИТ «Ховар» дар  Кумитаи кор бо ҷавонон ва варзиш.

Таъкид карда шуд, ки саҳми модарони тоҷик дар тарбия ва ба камол расонидани фарзандон дар руҳияи ватандӯстиву худшиносӣ ва таъмини иштироки онҳо дар мусобиқаҳои сатҳи байналмилалӣ боиси таҳсин аст.

Иброз гардид, ки имрӯз давлату Ҳукумати мамлакат ба ҳар як варзишгарзан таваҷҷуҳ ва эҳтироми хосса доранд. Бинобар ин,  ҷавобан ба ин таваҷҷуҳу ғамхориҳо пайваста баҳри гулгулшукуфоии минбаъдаи Тоҷикистони соҳибистиқлол дар қатори мардон ва чун шарики боэътимод дар кулли чорабиниҳои ҷамъиятиву сиёсӣ бо саҳмгузорӣ ва иштироки фаъолона, хираду заковат, матонату диловарӣ намунаи ибрат бошанд.

Дар вазъияти тантанавӣ ба 80 иштирокчии чорабинӣ туҳфаҳои хотиравӣ тақдим карда шуд.

АКС: Маркази таҳлил ва иттилооти Дастгоҳи марказии Кумитаи кор бо ҷавонон ва варзиши назди Ҳукумати Ҷумҳурии Тоҷикистон