Ҳамкории дуҷонибаи Тоҷикистон ва Узбекистон дар самти таҳсили олии касбӣ ва илм баррасӣ карда шуд

ДУШАНБЕ, 15.04.2024. /АМИТ «Ховар»/. Имрӯз Вазири маориф ва илми Ҷумҳурии Тоҷикистон Раҳим Саидзода бо Вазири таҳсилоти олӣ, илм ва инноватсияи Ҷумҳурии Узбекистон Конгратбай Шарипов дар шаҳри Тошканд вохӯрӣ намуд. Дар ин хусус ба АМИТ «Ховар» дар маркази матбуоти Вазорати маориф ва илми Ҷумҳурии Тоҷикистон хабар доданд.

Дар вохӯрӣ масоили рушди ҳамкории дуҷонибаи Ҷумҳурии Тоҷикистон ва Ҷумҳурии Узбекистон дар самти таҳсили олии касбӣ ва илм мавриди баррасӣ қарор гирифта, ҷонибҳо рушди босуръати ҳамкориро дар ин самт натиҷаи сиёсати хирадмандонаи сарони ду давлати ба ҳам дӯст унвон намуданд.

Ёдовар мешавем, ки Вазири маориф ва илми Ҷумҳурии Тоҷикистон дар доираи баргузории Форуми дуюми ректорони муассисаҳои таҳсилоти олии касбии Ҷумҳурии Тоҷикистон ва Ҷумҳурии Узбекистон, ки имрӯз баргузор мегардад, ба шаҳри Тошканд сафар намуд.

АКС: Маркази матбуоти Вазорати маориф ва илми Ҷумҳурии Тоҷикистон