Барои дар сатҳи баланд гузаронидани мусобиқаи байналмилалии Гран-Слам оид ба гӯштини ҷудо ҷаласаи кумитаи тадорукот доир гардид

ДУШАНБЕ, 17.04.2024. /АМИТ «Ховар»/. Бо мақсади дар сатҳи баланд баргузор намудани мусобиқаи байналмилалии Гран-Слам оид ба гӯштини ҷудо, ки аз 3 то 5 май дар шаҳри Душанбе баргузор мегардад, имрӯз бо роҳбарии муовини якуми Раиси шаҳри Душанбе ҷаласаи кумитаи тадорукот доир карда шуд, хабар медиҳад АМИТ «Ховар» бо истинод ба шуъбаи иттилоотии дастгоҳи Раиси шаҳри Душанбе.

Дар ҷаласа муовинони Раиси шаҳри Душанбе, намояндагони Кумитаҳои олимпӣ, ҷавонон ва варзиш, Федератсияи ҷудои Тоҷикистон, роҳбарони сохторҳои шаҳрӣ ва дигарон иштирок  намуданд.

Роҳбари кумитаи тадорукот иброз дошт, ки ин навбат низ бо дастгирии Раиси шаҳри Душанбе муҳтарам Рустами Эмомалӣ барои дар сатҳи баланд доир намудани мусобиқа қарори дахлдор ва нақшаи чорабиниҳои Мақомоти иҷроияи ҳокимияти давлатии шаҳри Душанбе ба тасвиб расид. Тибқи он вазифаҳо барои дар сатҳи баланд доир намудани чорабинӣ ба масъулин пешниҳод шуданд.

Аз ин рӯ аз масъулин талаб карда мешавад, ки баҳри дар сатҳи баланд доир намудани чорабинӣ масъулияти ҷиддӣ зоҳир намоянд.

АКС: Шуъбаи иттилоотии дастгоҳи Раиси шаҳри Душанбе