Дар ноҳияи Рӯшон барои пешгирӣ ва рафъи оқибатҳои офатҳои табиӣ машқи мукаммал гузаронида шуд

ХОРУҒ, 23.04.2024 /АМИТ «Ховар»/. Дар ноҳияи Рӯшони Вилояти Мухтори Кӯҳистони Бадахшон машқи мукаммали зернизомҳои ҳудудӣ ва зинавии низоми ягона оид ба пешгирӣ ва рафъи оқибатҳои ҳолатҳои фавқулода гузаронида шуд. Дар ин хусус хабарнигори минтақавии АМИТ «Ховар» Файз Мирасан хабар медиҳад.

Дар машқ ҳайати роҳбарикунанда ва қувваю воситаҳои зернизоми ҳудудӣ ва зинавии ноҳияи Рӯшон иштирок намуданд. Машқи низомӣ тавассути хадамоти иттиолоотии ноҳия бо садои бонги эълони ҷамъшавӣ дар назди бинои мақомоти иҷроияи ҳокимияти давлатии ноҳия шуруъ шуд.

Гуфта шуд,  ки ҳадафи машқҳои мукаммал баланд бардоштани омодагии мақомоти идоракунӣ, ҳайати шахсии комиссияҳои мақомоти иҷроияи ҳокимияти давлатӣ доир ба ҳолатҳои фавқулода, комиссияи эвакуатсионӣ, рушди маҳорати касбии ҳайати шахсии ҳамаи мақомоти дахлдор мебошад. Соли 2023 ҳангоми рух додани офатҳои табиӣ дар шаҳри Хоруғ ва ноҳияи Роштқалъа гурӯҳҳои наҷотдиҳӣ ва сокинони маҳаллӣ дар наҷот додани ҷон ва молу мулки зарардидагон маҳорату малакаи хуби касбӣ нишон доданд. Маҳз чунин машқҳои мукаммал имконият фароҳам оварданд, ки дар пешгирӣ, наҷотдиҳӣ ва барқарор кардани зарари офатҳои табиӣ ба таври касбӣ амал намоянд.

Минтақаи кӯҳистони Бадахшон  бо   иқлим ва  мавқеи ҷойгиршавии  ҷуғрофияш аз ҳамаи минтақаҳои қаламрави мамлакат  фарқ дошта, дар ҳар фасли сол дар ин ҷо ҳодисаҳои зиёди   табиӣ ба амал меоянд.

Марҳилаи аввали машқҳо дар шакли назариявӣ гузаронида шуда, иқдоми амалӣ бо иҷрои корҳои пешгирикунанда ва соҳилмустаҳкамкунӣ, инчунин кӯчонидани аҳолӣ аз мавзеъҳои зери хавф қарордошта ба минтақаҳои бехавф идома ёфт.

АКС: АМИТ «Ховар»