Дар Покистон оид ба ташаббусҳои ҷаҳонии Тоҷикистон дар соҳаи обу иқлим конфронс доир гардид

ДУШАНБЕ, 30.04.2024 /АМИТ «Ховар»/. Бо ташаббуси Сафорати Ҷумҳурии Тоҷикистон дар Ҷумҳурии Исломии Покистон дар ҳамкорӣ бо ҳукумати вилояти Панҷоб ва Донишгоҳи Осиёи Бузург (Grand Asia), воқеъ дар шаҳри Сиалкот аввалин Конфронси байналмилалӣ  бахшида ба тағйирёбии иқлим баргузор гардид. Дар ин хусус АМИТ «Ховар» бо истинод ба Сафорати Ҷумҳурии Тоҷикистон дар Покистон хабар медиҳад.

Дар конфронс беш аз 600 роҳбари институтҳои ҳавошиносӣ, пажуҳишгоҳҳои самти  обу иқлим, намояндагон ва мутахассисони иқлиму обу энергетика аз  кишварҳои аврупоӣ, институтҳои масъалаҳои энергетика ва энергияи «сабз», профессорон, донишҷӯён ва ВАО-и дохилӣ ва хориҷӣ ишитрок намуд.

Кордори Сафорати Тоҷикистон дар Покистон Саидҷон Шафизода дар конфронс таъкид намуд, ки Ҷумҳурии Тоҷикистон, ки 93 фоизи қаламрави онро кӯҳҳо ташкил медиҳанд, дар рӯёрӯйи пайомадҳои тағйирёбии иқлим яке аз давлатҳои осебпазир ба шумор рафта, ҳамасола бо обхезӣ, сел, фаромадани ярчу тарма ва дигар офатҳои табиии марбут ба об дучор мешавад, ки аз ин зарари зиёди молию моддӣ мебинем.

Иттилоъ дода шуд, ки бо  мақсади паст намудани таъсири манфии тағйирёбии иқлим ба соҳаҳои иҷтимоию иқтисодӣ Ҳукумати Тоҷикистон Стратегияи миллии мутобиқшавӣ ба тағйирёбии иқлимро барои давраи то соли 2030 татбиқ менамояд. Ҳиссаи Тоҷикистон дар ҳаҷми партовҳои газҳои гулхонаӣ ночиз буда, аз рӯйи андозаи пасти чунин партовҳо ҷойи 130-ро ишғол менамояд. Яъне аз рӯйи андозаи пасти чунин партовҳо Тоҷикистон дар ҷаҳон мавқеи пешсафро ишғол менамояд. Тоҷикистон ҳамчунин яке аз давлатҳои пешсафи сайёра аз рӯи фоизи истеҳсоли энергияи «сабз» ба ҳисоб меравад.

Тазаккур дода шуд, ки Тоҷикистон 98 фоизи барқро дар неругоҳҳои барқи обӣ истеҳсол карда, аз рӯйи фоизи тавлиди энергияи «сабз» аз ҳисоби манбаъҳои таҷдидшаванда дар ҷаҳон ҷойи шашумро ишғол менамояд. Дар оянда иқтидори истеҳсоли энергияи «сабз» ҳамчун заминаи асосии пешбурди иқтисоди «сабз» ду баробар афзоиш меёбад.

Таъкид шуд, ки бо ташаббуси Президенти Ҷумҳурии Тоҷикистон 4 қатънома дар мавзуи об ва 1 қатънома  аз ҷониби Маҷмаи Умумии Созмони Милали Муттаҳид дар бораи эълон намудани соли 2025 Соли байналмилалии ҳифзи пиряхҳо ва 21 март Рӯзи ҷаҳонии пиряхҳо қабул гардид.

Зимни суханронӣ намояндаи Аврупо таъкид намуд, ки Тоҷикистон дар даҳсолаи охир таваҷҷуҳи ҷомеаи ҷаҳониро дар масоили мубрам ва ниҳоят ҳассоси ҷаҳони имрӯза  дар мавзуъхои обу энергетика, энергияи сабз, сарфаи захираҳои обӣ, тағйирёбии иқлим, ҳифзи пиряхҳо, таъмини амнияти озуқаворӣ, тадбирҳои амалии пешгирии терроризму экстремизм, маводи мухаддир ва дигар ҷалб намуда, ба  ҳам овардааст.

Зимни конфронс иштирокчиён ташаббусҳои Тоҷикистонро бисёр муҳим ва саривақтӣ хонда, аз роҳбарияти мамлакат изҳори миннатдорӣ намуданд.

Дар давоми чорабинӣ ташаббусҳои ҷаҳонии Тоҷикистон ва конфронсу симпозиумҳои дар мамлакат баргузоршуда дар ҳудуди 15 дақиқа дар шакли видео ба намоиш гузошта шуд.

АКС: Сафорати Ҷумҳурии Тоҷикистон дар Ҷумҳурии Исломии Покистон