Раиси вилояти Хатлон бо ҷараёни парвариши картошка дар хоҷагии деҳқонии «Лолахон»-и ноҳияи Ёвон шинос шуд

ДУШАНБЕ, 13.04.2024 /АМИТ «Ховар»/. Дар доираи сафари корӣ ба ноҳияи Ёвон Раиси вилояти Хатлон Давлаталӣ Саид бо ҷараёни парвариши картошка дар хоҷагии деҳқонии «Лолахон», воқеъ дар деҳаи Ваҳдати ҷамоати шаҳраки Ҳаёти Нав шинос шуд, хабар медиҳад АМИТ «Ховар» бо истинод ба Мақомоти иҷроияи ҳокимияти давлатии вилояти Хатлон.

Хоҷагии деҳқонии «Лолахон» дорои 4 гектар замини корами обӣ буда, имсол дар майдони 0,60 гектар картошка, 2 гектар пахта, 0,50 гектар пиёз ва дигар намуди зироат кишт шудааст.

Раиси вилояти Хатлон зимни шиносоӣ бо фаъолияти хоҷагии деҳқонии «Лолахон» ба кори кишоварзон баҳои баланд дода, саҳмдоронро ба истифодаи боз ҳам пурсамари ҳар қитъа замин ҳидоят намуд. Гуфта шуд, ки нашъунамои хуби зироат бозгӯи заҳматҳои шабонарӯзаи деҳқонон ва муносибати оқилонаи онҳо ба замин мебошад.

Раиси вилоят бо хоҷагидор, раиси маҳалла ва сокинон суҳбат намуда, таъкид дошт, ки ба тарбияи фарзандон диққати ҷиддӣ дода, дар самти пешгирии гаравидани ҷавонон ба ҳизбу ҳаракатҳои иртиҷоӣ ва таълимоти ғайрирасмии динӣ, инчунин ҷалби ҷавонон ба хизмати ҳарбӣ, истифодаи самараноки заминҳои наздиҳавлигӣ ва гулшинонию сабзкорӣ ташаббус нишон диҳанд.

АКС: Мақомоти иҷроияи ҳокимияти давлатии вилояти Хатлон