Вобаста ба масъалаҳои мубрами филологияи Шарқ ва робитаҳои адабӣ конференсияи байналмилалӣ баргузор шуд

ДУШАНБЕ, 30.04.2024 /АМИТ «Ховар»/. «Масъалаҳои мубрами филологияи Шарқ ва робитаҳои адабӣ»-таҳти чунин унвон дар Донишгоҳи давлатии Хуҷанд ба номи академик Бобоҷон Ғафуров конференсияи байналмилалии илмӣ-назариявӣ баргузор гардид, хабар доданд ба АМИТ «Ховар» дар ин донишгоҳ.

Дар конференсия таъкид гардид, ки дар даврони истиқлоли Тоҷикистон илму маориф ба марҳилаи нави рушду тараққиёт ворид гардида, дар ҳама самтҳо пешравиҳои назаррас ба мушоҳида мерасанд. Истиқлоли миллӣ барои рушди тамоми соҳаҳои илми мамлакат, аз ҷумла филологияи Шарқ заминаи муассир гузошт.

Гуфта шуд, ки дар муддати кӯтоҳ дар заминаи таҳқиқи масоили мубрами ховаршиносӣ осори фаровоне рӯи нашр омад ва саҳми олимону донишмандони Донишгоҳи давлатии Хуҷанд дар ин замина басе назаррас мебошад.

Дар конференсия зимни маърузаҳои олимони шинохта масоили мубрами филологияи Шарқ, инчунин суннатҳои пойдории адабиёти халқҳои мухталифи Шарқ, тарҷумаи сарчашмаҳои адабиёти арабизабон ба форсии  тоҷикӣ ва ғайра мавриди баррасӣ қарор гирифтанд.

Бояд гуфт, ки ба кумитаи тадорукоти конференсия беш аз 100 маъруза аз мамлакатҳои мухталифи олам, аз ҷумла  Америка, Британияи Кабир, Миср, Алҷазоир, Русия, Ҳиндустон, Узбекистон, Олмон ва Нигерия пешниҳод гардид.

АКС: Донишгоҳи давлатии Хуҷанд ба номи академик Бобоҷон Ғафуров