Ҷамолиддин Абдуллозода ва Чин Ван Фечнао доир ба коркарди гиёҳҳои шифобахш мубодилаи афкор намуданд

ДУШАНБЕ, 29.05.2024. /АМИТ «Ховар»/. 28 май зимни вохӯрии Вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода бо Раиси ҳукумати мардумии шаҳри Чэндуи Ҷумҳурии Мардумии Чин Ван Фенчао густариши ҳамкорӣ дар бахши тибби халқӣ, табодули таҷрибаи табибони ду мамлакат, гузаронидани корҳои илмӣ-таҳқиқотӣ дар соҳаи тиб, коркарди гиёҳҳои шифобахш ва дигар масъалаҳои мавриди таваҷҷуҳи тарафайн баррасӣ шуданд. Дар ин хусус ба АМИТ «Ховар» дар Вазорати тандурустӣ ва ҳифзи иҷтимоии аҳолии мамлакат хабар доданд.

Дар ҷараёни вохӯрӣ иброз гардид, ки бештари мамлакатҳо аҳамияти тибби анъанавиро дар соҳаи тандурустӣ эътироф намуда, онро дар системаи миллии тандурустияшон муваффақона ҷорӣ мекунанд. Осиёи Марказӣ яке аз қадимтарин марказҳои тамаддуни ҷаҳонӣ буда, дар он тиб яке аз ҷойҳои муҳимтаринро ишғол мекунад. Таърихи тибби тоҷик мисоли равшани он аст.

Гуфта шуд, ки дар мамлакат Қонуни Ҷумҳурии Тоҷикистон «Дар бораи тибби халқӣ» қабул шудааст, ки он асосҳои ҳуқуқии фаъолияти самти тибби халқиро муайян мекунад.

 АКС: Вазорати тандурустӣ ва ҳифзи иҷтимоии аҳолии Ҷумҳурии Тоҷикистон