Дар ноҳияи Шаҳристон кишти картошка идома дорад

СУҒД, 19.05.2024 /АМИТ «Ховар»/. Дар ноҳияи Шаҳристони вилояти Суғд кишти картошка идома дошта, деҳқонон тасмим гирифтаанд, ки имсол дар 1735 гектар картошка кишт намоянд. Дар ин хусус ба АМИТ «Ховар» дар хадамоти матбуоти Раиси вилояти Суғд хабар доданд.

Тавре иттилоъ дода шуд, кишти картошка дар ноҳияи Шаҳристон то имрӯз тибқи нақшаи муқарраршуда 71 фоиз иҷро шуда, деҳқонон рӯзҳои наздик нақшаро пурра иҷро мекунанд.

Тибқи нақша, дар 1022 гектар замини Ҷамоати деҳоти Шаҳристон, дар 546 гектар замини Ҷамоати деҳоти Бунҷикат,​ дар 167 гектар замини ташкилоту муассисаҳо ва аз ин ҳисоб 100 гектар дар заминҳои Хоҷагии ҷангал картошка кишт карда мешавад.

Раиси вилояти Суғд дар ноҳияи Шаҳристон бо вазъи корҳои саҳроӣ, аз ҷумла кишти картошка шинос гардида, бо кишоварзон вохӯрӣ намуд. Ҳамзамон ба онҳо барои истифодаи самараноки замин, зиёд намудани майдони кишти картошка, бунёди боғҳои нав, аз ҷумла шинонидани ниҳоли хуч тавсияҳо дод.

АКС: Хадамоти матбуоти Раиси вилояти Суғд