Дар шаҳри Ашқобод муҷассамаи шоири тоҷик Сайидои Насафӣ гузошта шуд

Май 19, 2024 10:53

ДУШАНБЕ, 19.05.2024 /АМИТ «Ховар»/. Дар шаҳри Ашқободи Туркманистон дар доираи баргузории Конфронси байналмилалӣ бахшида ба 300-солагии шоир ва мутафаккири бузурги халқи туркман — Махтумқулӣ Фироқӣ дар боғи ҳамноми шоир муҷассамаи шоири тоҷик Сайидои Насафӣ гузошта шуд. Дар ин хусус ба АМИТ «Ховар» дар Вазорати фарҳанги Ҷумҳурии Тоҷикистон хабар доданд.

Дар расми ифтитоҳи муҷассама ва боғ ҳайати Ҷумҳурии Тоҷикистон таҳти роҳбарии Вазири фарҳанги Ҷумҳурии Тоҷикистон Матлубахон Сатториён иштирок намуда, дар пояи муҷассамаи Сайидои Насафӣ гулчанбар гузошт.

Бояд гуфт, ки Сайидои Насафӣ бузургтарин шоири асри XVII ва ибтидои асри ХVIII-и тоҷик аст.

Ӯ аз худ осори баландмазмуну рангини фаровон мерос гузаштааст, ки онҳо аз ҷумлаи дурдонаҳои таърихи адабиёти пурғановати тоҷик ба ҳисоб мераванд.

Мероси адабии Сайидои Насафӣ, ки ба шакли куллиёт ва девони ашъор фароҳам омада, то замони мо расидааст, аз ғазалиёт, қасидаву маснавиҳо, мухаммасу мусаддас, рубоиёту қитъаҳо, асари тамсилии «Баҳориёт», «Шаҳрошӯб» иборат буда, 8500 байтро дар бар мегирад.

Куллиёти шоир бо ғазал оғоз шуда, қисми бештари маҷмуаро ташкил медиҳад ва шумораи он ба 550 мерасад.

Ӯ яке аз сухансароёнест, ки забони шеъри классикии тоҷикро ба забони гуфугӯии халқ наздик кардааст.

Ҳамчунин дар доираи Конфронси байналмилалӣ Вазири фарҳанги Ҷумҳурии Тоҷикистон Матлубахон Сатториён бо муовини Раиси девони вазирони Туркманистон Меҳриҷамол Мамедова ва Вазири фарҳанги Туркманистон Атагелди Шамурадов мулоқот намуд.


Дар ҷараёни вохӯриҳо байни ҷонибҳо доир ба ҳамкории мутақобилан судманд дар соҳаи фарҳанг гуфтугӯ анҷом дода шуд.

Инчунин ҷониби Тоҷикистон дар ҷаласаи якуми Конфронси байналмилалӣ бахшида ба 300-солагии шоир ва мутафаккири бузурги халқи туркман — Махтумқулӣ Фироқӣ, ки таҳти унвони «Ҳаёт ва фаъолияти Махтумқулӣ Фироқӣ» баргузор гардид, раёсатро бар уҳда дошт.


Дар доираи Конфронс 18 май, ки дар Туркманистон ҳамчун рӯзи Конститутсия ва Парчам таҷлил карда мешавад, вазирони фарҳанги давлатҳои дӯст ва меҳмонон ҳамчун рамзи эҳтиром дар пояи муҷассамаи Конститутсия ва Парчами Туркманистон гулчанбар гузоштанд.

АКС: Вазорати фарҳанги Ҷумҳурии Тоҷикистон

Май 19, 2024 10:53

Хабарҳои дигари ин бахш

Мудири кулли ЮНЕСКО хонум Одри Азуле дар Осорхонаи миллии Тоҷикистон бо таъриху тамаддуни халқи тоҷик шинос шуд
ДИДГОҲЕ БАРОИ ПЕШРАФТИ ИЛМ. Андешаҳо дар ҳошияи мулоқоти Президенти Тоҷикистон бо аҳли илм ва маорифи мамлакат
Рӯзи шанбе дар милитсияи Хатлон «Рӯзи театр» эълон гардид
Дар қароргоҳи ЮНЕСКО дар Париж 815-солагии Мавлоно Ҷалолуддини Балхӣ таҷлил гардид
«СУРУДҲОИ МОНДАГОР». Дар қароргоҳи ЮНЕСКО-шаҳри Париж барномаи фарҳангии ҳунармандони тоҷик доир шуд
Дар конференсияи байналмилалӣ ба бузургдошти Мавлоно Ҷалолуддини Балхӣ дар Париж маҷаллаи «Пайванд» рӯнамоӣ шуд
«МАВЛОНО ҶАЛОЛУДДИНИ БАЛХӢ ВА САҲМИ Ӯ ДАР ГУСТАРИШИ ФАРҲАНГИ ҶАҲОН». Таҳти чунин унвон бо ташаббуси Тоҷикистон дар ЮНЕСКО конференсияи байналмилалӣ оғоз гардид
«АЗ ХУРОСОНАМ КАШИДӢ, ТО БАРИ ЮНОНИЁН…». Ба гиромидошти хотираи мутафаккири бузурги тоҷик мавлоношиносони ҷаҳон дар Париж ҷамъ меоянд
«ҶОН ШАВУ АЗ РОҲИ ҶОН ҶОНРО ШИНОС». Тоҷикистон 815-солагии Мавлоно Ҷалолуддини Балхиро дар қароргоҳи ЮНЕСКО таҷлил менамояд
«ТОҶИКИСТОН-ВАТАНИ АЗИЗ МАН». Даври дуюми озмуни ҷумҳуриявӣ то охири моҳ ҷамъбаст мегардад
Дар шаҳри Остона ҷаласаи умумии 78-уми Шурои мудирони Маркази байналмилалии илмию техникӣ доир гардид
Намоиши ҷашнии Тоҷикистон дар қароргоҳи ЮНЕСКО ифтитоҳ гардид

Маводҳои таҳлилӣ