Дар шоҳроҳи Обигарм-Нуробод дарозтарин пул бунёд мешавад

Май 18, 2024 08:54

ДУШАНБЕ, 18.05.2024 /АМИТ «Ховар»/. Дар ҷаласаи навбатии Маҷлиси намояндагони Маҷлиси Олии Ҷумҳурии Тоҷикистон Созишномаи қарзӣ байни Ҷумҳурии Тоҷикистон ва Бонки осиёии сармоягузории инфрасохторӣ оид ба лоиҳаи «Роҳи Обигарм-Нуробод — пули дароз ва роҳҳои ба он васлшаванда» тасдиқ карда шуд.

Созишномаи қарзӣ моҳи апрели соли 2024 дар шаҳри Душанбе ба имзо расида, ҳаҷми умумии маблағи қарзии ҷалбшаванда 75,5 миллион доллари амрикоиро ташкил менамояд. Мақсад аз ҷалби ин маблағи қарзӣ сохтмони пул бо дарозии 920 метр дар роҳи мошингарди Обигарм — Нуробод мебошад. Бунёди пули мошингузар дар масири Обигарм — Нуробод равобити нақлиётӣ байни Тоҷикистон ва кишварҳои ҳамсарҳадро тавассути шоҳроҳи М-41, инчунин бехатарии ҳаракати воситаҳои нақлиётро дар ин масир таъмин намуда, ба сарфаи вақту коҳиш додани арзиши ҳамлу нақл мусоидат мекунад.

Вазири молияи Ҷумҳурии Тоҷикистон Файзиддин Қаҳҳорзода дар ҷаласаи Маҷлиси намояндагони Маҷлиси Олии Ҷумҳурии Тоҷикистон иттилоъ дод, ки барои татбиқи пурраи ин масири роҳ дар умум ҷалби 407,9 миллион доллар дар назар дошта шудааст.

Бонки осиёии сармоягузории инфрасохторӣ дар баробари пешниҳоди кумаки техникӣ дар ҳаҷми 3,2 миллион доллари амрикоӣ ҳамчунин ба маблағи 75,5 миллион доллари ИМА қарз пешниҳод мекунад. Саҳми Ҳукумати Ҷумҳурии Тоҷикистон дар амалисозии ин лоиҳа 28,8 миллион доллари амрикоиро ташкил медиҳад. Ҳамчунин барои татбиқи лоиҳа аз ҳисоби маблағҳои грантии Бонки осиёии рушд ҷалби 110 миллион доллари амрикоӣ дар назар дошта шудааст. Бонки аврупоии таҷдид ва рушд 150,3 миллион доллар ва Фонди ОПЕК 40,0 миллион доллар қарз пешниҳод намуданд.

Татбиқи лоиҳа соли 2024 оғоз гардида, соли 2030 ба анҷом мерасад: чор сол ба сохтмон ва ду соли дигар ба нигоҳдории пул равона мегардад.

Муовини раиси кумитаи Маҷлиси намояндагони Маҷлиси Олии Ҷумҳурии Тоҷикис­тон оид ба иқтисод ва молия Азиз Гиёзода изҳор кард, ки ҳоло дар соҳаи нақлиёти мамлакат 17 лоиҳаи давлатии сармоягузорӣ ба маблағи беш аз 13 миллиард сомонӣ амалӣ мешавад.

Татбиқи лоиҳаҳои сохтмону таҷдиди роҳҳои мошингарди Роғун-Обигарм-Нуробод бо маблағи 3,3 миллиард сомонӣ идома ёфта, бо тасдиқ шудани лоиҳаи созишномаи қарзӣ байни Ҷумҳурии Тоҷикистон ва Бонки осиёии сармоягузории инфрасохторӣ барои ҷалби маблағи қарзӣ дар ҳаҷми 75,5 миллион доллари амрикоӣ бунёди калонтарин пули мамлакат бо дарозии 920 метр оғоз мешавад.

Ёдовар мешавем, ки яке аз се ҳадафи нахустини стратегияи миллии Ҷумҳурии Тоҷикистон баъд аз расидан ба истиқлоли давлатӣ раҳоӣ ёфтан аз бунбасти коммуникатсионӣ эълон шуда буд.

Баҳри дар ҳаёт татбиқ намудани ин ҳадафи стратегии миллӣ бо ташаббус ва дастгирии Ҳукумати мамлакат шоҳроҳи «Душанбе-Бӯстон-Чанак» бунёду навсозӣ карда шуд, дар ағбаҳои Шаршар, Чормағзак, Анзоб ва Шаҳристон нақбҳои мошингузар ба истифода дода шуданд. Ҳамчунин роҳҳои мошингарди «Душанбе-Нуробод-Ҷиргатол-Саритош», «Кӯлоб-Қалъаи Хумб-Хоруғ-Кулма», роҳи мошингарди «Қурғонтеппа-Дӯстӣ» навсозӣ карда шуданд. Аз болои дарёи Панҷ пули мошингузари «Дӯстӣ» (дар умум шаш пул) сохта шуданд, ки Тоҷикистонро бо кишвари Афғонистон мепайванданд.

Ҳамарӯза аз чор фурудгоҳи байналмилалӣ, воқеъ дар шаҳрҳои Душанбе, Бохтар, Кӯлоб ва Суғд ба кишварҳои гуногуни минтақа ва ҷаҳон парвозҳои мустақим доир мешаванд.

Акрам САНГЗОДА,
АМИТ «Ховар» 

АКС аз бойгонӣ

Май 18, 2024 08:54

Хабарҳои дигари ин бахш

Ба Тоҷикистон низоми муосири баҳисобгирии дороиҳои роҳҳо «ROMDAS» ворид карда шудааст
«Тоҷикаэронавигатсия»: «Дар шаш моҳи соли равон шумораи парвозҳои транзитӣ афзуда, дар муқоиса ба ҳамин давраи соли гузашта 70,5 фоиз зиёд гардидааст»
НИШАСТИ МАТБУОТӢ. Дар ноҳияи Фирдавсии пойтахт 164 бинои баландошёнаи истиқоматӣ бунёд мешавад
Фурудгоҳҳои байналмилалии Тоҷикистон дар соли равон ба зиёда аз 1,6 миллион мусофир хизмат расонидаанд
Тоҷикистону Узбекистон ҷиҳати бехатарии молу маҳсулот ва баҳодиҳии мутобиқат нақшаи корӣ таҳия намуданд
Байни Душанбе ва Лондон роҳи ҳавоӣ ифтитоҳ мегардад
Соли равон дар бозорҳои истеъмолии ҷумҳурӣ зиёда аз 560 ҳазор ташхиси маҳсулоти озуқаворӣ гузаронида шуд
Хадамоти алоқа: «Дар Тоҷикистон ҷиҳати таъмин намудани алоқаи мобилии насли 4 G 157 истгоҳи базавӣ насб гардид»
Соли равон дар Тоҷикистон ҳаҷми боркашонӣ 13,8 фоиз ва мусофирбарӣ 9 фоиз афзудааст
«ҲИФЗИ МОРХӮР: СТРАТЕГИЯҲО ВА ТАҶРИБАҲОИ САМАРАНОК». Таҳти ин унвон дар Ню-Йорк доир ба ташаббуси Тоҷикистон ҳамоиш доир шуд
Тоҷикистон ва Маҷористон ҳамкориро дар соҳаи авиатсия рушд медиҳанд
Дар ноҳияи Кӯҳистони Мастчоҳ бинои нави маъмурии кумитаи идораи замин бунёд мешавад