«ДАР СИЁСАТИ ПЕШВОИ МИЛЛАТ УСТУВОРЕМ!». Таҳти чунин унвон дар вилояти Хатлон чорабиниҳои моҳвораи ҷавонон доир мешаванд

ДУШАНБЕ, 15.05.2024 /АМИТ «Ховар»/. «Дар сиёсати Пешвои миллат устуворем!» — таҳти чунин унвон бахшида ба Рӯзи ҷавонони Тоҷикистон дар тамоми шаҳру ноҳияҳои вилояти Хатлон  дар доираи моҳвораи ҷавонон чорабиниҳо баргузор мегарданд. Дар ин хусус ба АМИТ «Ховар» дар хадамоти матбуоти Раиси вилояти Хатлон хабар доданд.

Дар доираи чорабиниҳои моҳвораи ҷавонони вилоят барномаҳои фарҳангӣ дар боғҳои фарҳангию фароғатии шаҳру ноҳияҳо, ҳамоишҳои минтақавии гирандагони Стипендияи президентӣ дар шаҳрҳои Бохтар ва Кӯлоб, ташкили тамошои дастҷамъонаи намоишҳои театрӣ ва саёҳати ҷавонон ба мавзеъҳои таърихӣ, ёдгориҳои фарҳангӣ, осорхонаҳо, вохӯриҳо бо ҷавондухтарони ятим ва онҳое, ки тибқи квотаи президентӣ дар донишгоҳу коллеҷҳо таҳсил доранд, конфронси илмӣ-назариявӣ ва якчанд мусобиқаи варзишӣ баргузор мешаванд.

Ёдовар мешавем, ки 23 майи  соли  1997  Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо намояндагони ҷавони Тоҷикистон мулоқот намуда, фармон  «Оид ба баъзе масъалаҳои беҳтар кардани кор бо ҷавонон»-ро ба имзо расониданд. Маҳз ҳамин рӯзи таърихӣ сабаб шуд, ки  23 май Рӯзи ҷавонон эълон гардад.

АКС: АМИТ «Ховар»