Директори Хазинаи байналмилалии асъор бо занони пешсафи тоҷик мулоқот намуд

ДУШАНБЕ, 18.05.2024. /АМИТ «Ховар»/. 16 май дар доираи сафари кории ҳайати Хазинаи байналмилалии асъор ба Ҷумҳурии Тоҷикистон дар меҳмонхонаи «Hyatt Regency» суҳбати озоди директори иҷроияи Хазинаи байналмилалии асъор хонум Кристалина Георгиева бо занону духтарони фаъоли ҷамъиятӣ ва давлатӣ баргузор гардид. Дар ин хусус АМИТ «Ховар» бо истинод ба Бонки миллии Тоҷикистон хабар медиҳад.

Меҳвари асосии суҳбатро масъалаҳои марбут ба таъмини баробарии гендерӣ дар тамоми қишрҳои Ҷумҳурии Тоҷикистон, аз ҷумла дар оила ва бозори меҳнат, таъсири он ба рушди иҷтимоӣ, муҳиммият ва мақсадҳои асосии баробарии гендерӣ, инчунин дигар андешаҳои ҷолибу созандаи занони фаъол вобаста ба рушду нумуи мамлакат  ташкил дод.

Бояд гуфт, ки дар мулоқот муовини Сарвазири Ҷумҳурии Тоҷикистон Дилрабо Мансурӣ, муовини раиси Ҳизби Халқии Демократии Тоҷикистон Хайриниссо Юсуфӣ, Вазири меҳнат, муҳоҷират ва шуғли аҳолии Ҷумҳурии Тоҷикистон Гулнора Ҳасанзода, муовини якуми Вазири адлияи Ҷумҳурии Тоҷикистон Нигина Ализода, муовини Раиси Бонки миллии Тоҷикистон  Гулбаҳор Назирӣ, муовини директори Агентии хизмати давлатии назди Президенти Ҷумҳурии Тоҷикистон Ҳилолбӣ Қурбонзода ва дигар занони фаъол ва пешсафи ҷумҳурӣ иштирок доштанд.

АКС: Бонки миллии Тоҷикистон