МОҲВОРАИ ҶАВОНОН. Дар шаҳри Бохтар Фестивали бозиҳои миллӣ баргузор гардид

ДУШАНБЕ, 17.05.2024. /АМИТ «Ховар»/. Бахшида ба Рӯзи ҷавонони Точикистон ва дар доираи моҳвораи ҷавонон дар шаҳри Бохтари вилояти Хатлон Фестивали бозиҳои миллӣ баргузор гардид. Дар он варзишгарони ноҳияҳои Вахш, Кӯшониён ва шаҳри Бохтар фаъолона иштирок намуда, ҳунару маҳорати варзишиашонро манзури меҳмонон гардониданд. Дар ин хусус ба АМИТ «Ховар» дар Кумитаи кор бо ҷавонон ва варзиши назди Ҳукумати Ҷумҳурии Тоҷикистон хабар доданд.

Раиси Кумитаи кор бо ҷавонон ва варзиш аз дастовардҳои варзишгарони вилоят изҳори қаноатмандӣ намуда, тамоми варзишгаронро ба муносибати Рӯзи ҷавонони Тоҷикистон табрик намуд.

Гуфта шуд, ки таваҷҷуҳи ҳукумати мамлакат ба варзишгарон бештар гардида, барои тамрину баргузории чорабиниҳои варзишӣ тамоми шароити зарурӣ фароҳам оварда шудааст, то шарафи Тоҷикистон дар арсаи байналмилалӣ боз ҳам боло бардошта шавад.

Ҳадаф аз баргузории фестивал эҳё намудани бозиҳои миллии варзишӣ ва ба ин васила муаррифӣ намудани фарҳанг, тамаддун ва таърихи халқи тоҷик дар арсаи байналмилалӣ, тарбия намудани наврасону ҷавонон дар руҳияи худшиносию худогоҳӣ ва эҳтиром гузоштан ба арзишҳои миллӣ мебошад.

АКС: Кумитаи кор бо ҷавонон ва варзиши назди Ҳукумати Ҷумҳурии Тоҷикистон