ОГОҲӢ. Дар Тоҷикистон 24-25 май боронҳои пуршиддат, сел, жола ва раъду барқ дар назар аст

ДУШАНБЕ, 23.05.2024. /АМИТ «Ховар»/. Агентии обуҳавошиносии Тоҷикистон иттилоъ медиҳад, ки 24-25 май дар ҷумҳурӣ боронҳои пуршиддат, сел, раъду барқ ва жола пешбинӣ шудааст. Дар робита ба ин Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон бо мақсади пешгирии садамаҳои марбут ба оқибатҳои эҳтимолии шароити обу ҳаво бори дигар ба идораҳои дахлдор ва аҳолӣ муроҷиат менамояд, ки барои пешгирии оқибатҳои сел каналҳо, селроҳаҳо ва ҷӯйборҳоро тоза кунанд. Дар ин хусус АМИТ «Ховар» бо истинод ба ин кумита хабар медиҳад.

Кумита ҳамзамон ба саҳми волидон мерасонад, ки фарзандони нобилиғашонро беназорат нагузоранд, онҳоро ба моҳидорӣ ва чорвочаронӣ, инчунин ҷамъоварии гиёҳҳои шифобахш равон накунанд.

Сокинон қабл аз борони бошиддат бояд каналу ҷӯйбор ва селроҳаҳоро аз ҳар гуна санг ва хасу хошок тоза кунанд, то оби сел роҳи гузаштан дошта бошад ва ба ҳавливу қитъаҳои наздиҳавлигии аҳолӣ ворид нашавад.

Дар ҳолати рӯбарӯ шудан бо ин ё он ҳодисаи фавқулода сокинон метавонанд бо телефонҳои 112 ва ё 93 880 28 19, 88 400 01 01 занг зананд.

АКС аз бойгонӣ