ҲУШДОР! 10-12 май тағйирёбии вазъи ҳаво ва офатҳои табиии эҳтимолӣ дар назар аст

ДУШАНБЕ, 07.05.2024. /АМИТ «Ховар»/. Тибқи маълумоти Агентии обуҳавошиносии мамлакат, 10-12 майи соли 2024 дар якчанд шаҳру навоҳии  тобеи ҷумҳурӣ ба амал омадани раъду барқ, жола ​​ва сел дар назар аст. Дар робита ба ин Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон бо истинод ба Агентӣ  ба маълумоти шаҳрвандон ва меҳмонони мамлакат мерасонад, ки эҳтиёткор бошанд.

Ба иттилои манбаъ, дар шаҳрҳои Душанбе, Ваҳдат, Норак, ноҳияҳои Рӯдакӣ, Варзоб, Ҳисор, Файзобод, Нуробод, Рашт, Сангвор, Тоҷикобод, Лахш, Лучоб, Қаратоғ, дар вилояти Хатлон- шаҳри Кӯлоб, ноҳияҳои  Ёвон, Хуросон, Данғара, Ховалинг, Мӯъминобод, Шамсиддини Шоҳин, Балҷувон, Восеъ ва Даштиҷум, дар вилояти Суғд  асосан дар шаҳрҳои Панҷакент, Исфара, Истаравшан, ноҳияҳои  Айнӣ, Мастчоҳи Кӯҳӣ, Шаҳристон, Деваштич, Ашт ва ноҳияҳои ғарбии Вилояти Мухтори Кӯҳистони Бадахшон- шаҳри Хоруғ, ноҳияҳои Рӯшон, Дарвоз, Ванҷ боришоти зиёд  ва  сел дар назар аст.

Инчунин 10-12 май дар дарёҳои Ёхсу, Қизилсу (ҷанубӣ) ва дарёҳое, ки аз нишебиҳои ҷанубии қаторкӯҳҳои Ҳисор – Варзоб ва Лучоб ҷорӣ мешаванд, болоравии сатҳи об дар назар аст.

Дар робита ба ин Кумита бо мақсади пешгирии ҳолатҳои марбут ба оқибатҳои эҳтимолии тағйирёбии боду ҳаво огоҳ менамояд, ки барои пешгирии оқибатҳои омадани сел каналу заҳбурҳоро тоза намоянд.

Дар ҳолатҳои фавқулода шаҳрвандон метавонанд ба Кумитаи ҳолатҳои фавқулода ва мудофиаи гражданӣ  бо рақамҳои 112 ё 93 880 28 19, 88 400 01 01 тамос гиранд.

АКС: Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон