Дар Душанбе ҷаласаи 3-юми аъзои Гурӯҳи кории бисёрҷониба барои баррасии Харитаи роҳ доир гардид

ДУШАНБЕ, 14.06.2024 /АМИТ «Ховар»/. 14 июн дар Душанбе таҳти роҳбарии муовини Вазири меҳнат, муҳоҷират ва шуғли аҳолии мамлакат Қиёмиддин Давлатзода дар доираи лоиҳаи «Кумаки техникии Иттиҳоди Аврупо ба соҳаҳои маориф ва меҳнати Ҷумҳурии Тоҷикистон» ҷаласаи 3-юми аъзои Гурӯҳи кории бисёрҷониба баҳри баррасии Харитаи роҳ барои озмоиши 3 равияи шарикии давлат ва бахши хусусӣ дар соҳаи рушди малака баргузор гардид.

Тавре дар Вазорати меҳнат, муҳоҷират ва шуғли аҳолии мамлакат ба АМИТ «Ховар» хабар доданд, дар ҷаласа Харитаи роҳ барои татбиқи якчанд чорабиниҳо аз моҳи июни соли 2024 то декабри соли 2027, зарурати таъсиси шарикии давлат ва бахши хусусӣ, нақши кумитаҳои соҳавӣ ва Гурӯҳи кории бисёрҷониба дар амалӣ намудани чорабиниҳои дар Харитаи роҳ пешбинишуда, ҳамкории Гурӯҳи кории бисёрҷониба ва кумитаҳои соҳавӣ дар самти омӯзиши устувор дар асоси кор, муаррифии вебсайти кумитаҳои соҳавӣ ва дигар масъалаҳо баррасӣ гардиданд.

Ҳадафи Харитаи роҳ фароҳам овардани муҳити мусоид барои озмоиши ҳадди ақалл 3 равияи ҳамкории бахшҳои давлативу хусусӣ бо 20 муассиса, аз ҷумла муассисаҳои таҳсилоти ибтидоӣ ва миёнаи касбӣ ва марказҳои таълими калонсолон мебошад.

 АКС: Вазорати меҳнат, муҳоҷират ва шуғли аҳолии Ҷумҳурии Тоҷикистон