Дар ноҳияи Восеъ Рӯзи байналмилалии ҳифзи кӯдаконро хотирмон таҷлил намуданд

ВОСЕЪ, 01.06.2024. /АМИТ «Ховар»/. Рӯзи байналмилалии ҳифзи кӯдакон ҳамасола дар саросари ҷумҳурӣ бо шукуҳу шаҳомати хосса таҷлил карда мешавад. Дар ташкилоти ибтидоии ҳизбии “Баҳористон-Боғчаи №1”–и ноҳияи Восеъ бахшида ба ин рӯз барномаи фарҳангиву фароғатӣ баргузор гардид, иттилоъ медиҳад мухбири минтақавии АМИТ «Ховар» Сулаймон Холзода.

Дар барнома сараввал ба кӯдакон аз тарафи Кумитаи иҷроияи Ҳизби Халқии Демократии Тоҷикистон дар ноҳияи Восеъ туҳфаҳои идона тақдим шуда, таъкид гардид, ки бештар ба омӯзиш ва азхуднамоии илм машғул гарданд.

Гуфта шуд, ки дар Тоҷикистон кӯдакону наврасон таҳти ғамхории доимии давлат ва Ҳукумати мамлакат қарор доранд. Зеро Тоҷикистон тибқи Конститутсия давлати иҷтимоӣ буда, барои ҳифзи иҷтимоии кӯдакону наврасон, аз ҷумла кӯдакони ниёзманду камбизоати аҳолӣ вазифадор мебошад. Ҳамаи кӯдакони мамлакат узви соҳибҳуқуқи ҷомеаи мо буда, ба табобат, таҳсил ва фароғат ҳуқуқи комил доранд.

Ҳукумати Ҷумҳурии Тоҷикистон баҳри шароити мусоид фароҳам овардан барои наврасон тамоми тадбирҳои заруриро меандешад.

Аз ҷониби таълимгирандагони боғчаи “Баҳористон” саҳначаҳо ва барномаи ҷолиби фарҳангӣ пешкаши ҳозирин гардонида шуд. 

АКС: Кумитаи иҷроияи Ҳизби Халқии Демократии Тоҷикистон дар ноҳия Восеъ